Mae codi buddsoddiad yn un o'r cerrig milltir mwyaf cyffrous - a brawychus - i lawer o gwmnïau technoleg newydd. Ond cyn i chi ddechrau caboli'ch cyflwyniad neu drefnu cyfarfodydd penodol gyda buddsoddwyr, mae'n werth gofyn: ydych chi wir yn barod, nid yn unig ar gyfer negodi'r broses fuddsoddi ond hefyd i adeiladu perthynas hirdymor, fuddiol i'r ddwy ochr gyda buddsoddwyr?
Mae'r erthygl hon yn archwilio beth mae parodrwydd buddsoddwyr yn ei olygu mewn gwirionedd, pam ei fod yn bwysig, a sut y gall sylfaenwyr asesu eu parodrwydd. Byddwn yn darparu rhestr wirio ymarferol, yn tynnu sylw at beryglon cyffredin, ac yn cynnig canllawiau i'ch helpu i fynd ati i godi arian gyda hyder ac eglurder.
Beth mae'n ei olygu i fod yn barod am fuddsoddwyr?
Mae parodrwydd am fuddsoddwyr yn mynd ymhell y tu hwnt i gael syniad gwych neu araith farchnata slic. Mae'n ymwneud â dangos bod eich busnes yn hyfyw, y gellir cynyddu ei raddfa, ei fod yn cyd-fynd â'r hyn y mae buddsoddwyr yn chwilio amdano a'i fod yn gallu gwrthsefyll ymarferion craffu. Mae hyn yn golygu sicrhau bod y sylfeini cywir yn eu lle, yn amrywio o'ch tîm a'ch cynnyrch i'ch cyllid a'ch llywodraethiant.
Mae ymchwil yn dangos bod paratoi yn allweddol i lwyddiant, tra bydd mentergarwyr sydd wedi codi buddsoddiad yn dweud wrthych fod codi arian yn gofyn am gadernid a llawer o waith. Gall bod yn barod ar gyfer buddsoddwyr eich helpu i:
Wneud y gorau o’ch siawns o sicrhau buddsoddiad
Cyflymu'r broses codi arian
Adeiladu hygrededd gyda buddsoddwyr
Eich helpu i osgoi camgymeriadau neu oedi costus
Rhestr wirio parodrwydd am fuddsoddwyr
Noder nad ffurflen gais yw hon, ac nid yw’n rhestr gynhwysfawr ychwaith. Ni fydd dilyn y camau hyn yn gwarantu cyllid, ond byddant yn eich helpu i baratoi a gwneud y mwyaf o'ch siawns o lwyddo.
Mae hefyd yn werth cofio nad yw parodrwydd am fuddsoddwyr yn broses sy'n addas i bawb. Mae gan wahanol fuddsoddwyr wahanol flaenoriaethau, ac mae bod yn "barod" yn golygu gymaint am feddylfryd ac eglurder ag y mae ynghylch cael y dogfennau cywir yn eu lle.
1. Paratoi eich meddwl
Siaradwch â'ch cymar sy’n bwysig i chi neu’ch partner busnes
Mae codi arian yn broses ddwys. Gall gymryd chwe mis neu fwy a bydd yn effeithio ar eich bywyd personol. Gwnewch yn siŵr bod gennych gefnogaeth gartref a'ch bod wedi paratoi'n feddyliol ar gyfer y daith.
Byddwch yn barod i ollwng gafael ar ecwiti a rhywfaint o reolaeth
Mae buddsoddwyr yn disgwyl cael cyfran yn eich busnes a chael llais mewn penderfyniadau busnes mawr. Mae'n bwysig deall beth mae hyn yn ei olygu yn ymarferol, gan gynnwys hawliau gwanhau a chydsynio. Cofiwch, serch hynny, nad ydych chi'n "rhoi ecwiti i ffwrdd". Rydych chi'n ei werthu yn gyfnewid am arian ac yn aml, llawer mwy na hynny. Mae llawer o fuddsoddwyr yn dod ag arbenigedd gwerthfawr, canllawiau strategol, a chysylltiadau diwydiant a all gyflymu eich twf. Mae'n gyfnewid teg am werth, gyda'r ddwy ochr wedi ymrwymo i ddyfodol eich busnes.
Ystyriwch ddod o hyd i gyd-sylfaenydd
Er nad yw'n gwbl ofynnol, gall cael cyd-sylfaenydd gryfhau eich sefyllfa codi arian. Yn aml, mae buddsoddwyr yn chwilio am dimau cyflenwol gyda chyfrifoldeb a rennir a setiau sgiliau amrywiol. Gall cyd-sylfaenydd hefyd helpu i redeg y busnes tra byddwch chi'n canolbwyntio ar godi arian, a chynnig cefnogaeth emosiynol yn ystod yr hyn a all fod yn broses heriol. Os ydych chi'n mynd ar eich liwt eich hun, byddwch yn barod i ddangos sut y byddwch chi'n rheoli'r llwyth gwaith ac yn llenwi unrhyw fylchau sgiliau.
Sicrhewch eich bod yn gwybod beth rydych chi ei eisiau gan fuddsoddwr
Nid yw pob buddsoddwr yr un fath , ac mae gwybod beth rydych chi ei eisiau yn hanfodol. Faint o gyfalaf gan faint o fuddsoddwyr unigol? Ydych chi eisiau iddyn nhw fod ar eich bwrdd? Pa mor weithredol ydych chi eisiau iddyn nhw fod? Ydych chi'n chwilio am fuddsoddwyr penodol i'r sector sydd â chysylltiadau yn y diwydiant? Mae yna sylfaen fawr o fuddsoddwyr allan yna, felly canolbwyntiwch eich ymdrechion ar y rhai a all gynnig yr hyn sydd ei angen arnoch chi.
2. Logisteg a hylendid gweithredol
Gwnewch ddigon o le yn eich dyddiadur
Mae codi arian yn cymryd llawer o amser. Ewch i’r afael â hyn fel swydd amser llawn a chael gwared ar bethau eraill sy'n tynnu eich sylw, lle bo modd.
Cynlluniwch eich ymadawiad o'ch rôl bresennol
Nid oes angen i chi roi'r gorau i'ch swydd o reidrwydd cyn codi buddsoddiad, ond dylech fod yn barod i ymrwymo'n llawn amser unwaith y bydd cyllid wedi'i sicrhau. Mae buddsoddwyr eisiau gweld eich bod wedi buddsoddi'n llawn yn llwyddiant y busnes. Er bod rhai sylfaenwyr yn dechrau codi arian tra'n dal i fod mewn cyflogaeth mewn man arall, bydd y rhan fwyaf o fuddsoddwyr yn disgwyl i chi drawsnewid i'r cwmni newydd yn llawn amser fel amod o'r fargen. Yn aml, caiff hyn ei ffurfioli mewn cytundeb gwasanaeth.
Cofiwch fod CVs yn bwysig i fuddsoddwyr ac yn aml yn ffurfio darn allweddol o ddiwydrwydd dyladwy rheoli. Gwnewch yn siŵr bod eich un chi wedi’i ddiweddar ac yn gyfredol ac yn adlewyrchu newid proffesiynol, gan ddangos eich bod wedi ymdrin â'ch ymadawiad yn gyfrifol.
Cofrestrwch eich busnes a sefydlu swyddfa gofrestredig
Mae sefydlu strwythur cwmni ffurfiol yn arwydd o hygrededd i fuddsoddwyr a phartneriaid. Mae hyn yn cynnwys cofrestru eich busnes gyda Thŷ'r Cwmnïau a phenodi eich hun (ac unrhyw gyd-sylfaenwyr) yn gyfarwyddwyr. Bydd angen i chi hefyd ddarparu cyfeiriad swyddfa gofrestredig - yn ddelfrydol nid eich cartref, gan fod y wybodaeth hon yn dod yn hygyrch i'r cyhoedd. Mae defnyddio swyddfa â gwasanaeth neu gyfeiriad rhithwir yn ffordd syml a chost-effeithiol o gynnal preifatrwydd a chyflwyno delwedd broffesiynol.
Er ei bod hi'n iawn cadw costau cyffredinol yn isel a gweithio o gartref yn ystod y cyfnodau cynnar, unwaith y byddwch chi'n sicrhau buddsoddiad, efallai y bydd eich buddsoddwyr eisiau ymweld â'ch safle. Ar y pwynt hwnnw, mae'n werth ystyried desg mewn gofod cydweithio neu ganolfan feithrin, sydd hefyd yn cynnig cyfleoedd rhwydweithio ac amgylchedd mwy cydweithredol.
Penodwch gyfreithiwr a chyfrifydd
Mae cynghorwyr cyfreithiol ac ariannol yn hanfodol ar gyfer llywio'r broses codi arian ac osgoi camgymeriadau costus.
Ffurfiwch fwrdd a phenodwch Gadeirydd
Mae bwrdd cryf yn ychwanegu gwerth strategol ac yn tawelu meddyliau buddsoddwyr. Gall Cadeirydd weithredu fel clustog rhwng sylfaenwyr a buddsoddwyr, gan helpu i reoli perthnasoedd.
Darganfyddwch pa yswiriant sydd ei angen arnoch chi
Byddwch angen yswiriant Atebolrwydd Cyflogwr ac yswiriant Person Allweddol arnoch o leiaf. Mae lefel y warchodaeth ar gyfer yswiriant Person Allweddol fel arfer tua dwywaith eich cyflog blynyddol, ond gall y gofynion amrywio, felly mae'n well cadarnhau gyda'ch buddsoddwyr.
Mae hefyd yn ddoeth ystyried polisïau ychwanegol fel yswiriant Indemniad Proffesiynol, Atebolrwydd Cyhoeddus a Chynnyrch, ac Amddiffyniad Cyfreithiol, yn dibynnu ar natur eich busnes. Ar gyfer risgiau penodol i'r sector, efallai y bydd angen gwarchodaeth wedi'i deilwra - er enghraifft, yswiriant Safle a Rhestr Eiddo ar gyfer busnesau gweithgynhyrchu.
Nid oes angen i chi dalu am y polisïau tan y funud olaf, ond mae'n ddoeth casglu dyfynbrisiau ymlaen llaw fel y gallwch symud yn gyflym pan ddaw'r amser.
Twtiwch eich cyfrifon banc
Yn ystod y cyfnodau cynnar, nid yw'n anghyffredin i gyllid personol a busnes fynd yn aneglur. Fodd bynnag, bydd buddsoddwyr fel arfer yn gofyn am o leiaf chwe mis o ddatganiadau banc busnes yn ystod yr archwiliad diwydrwydd dyladwy. Gwnewch yn siŵr bod y cofnodion hyn yn dwt a glân, yn broffesiynol, ac yn rhydd o unrhyw beth a allai godi pryderon.
Os ydych chi'n defnyddio banc heriol ar hyn o bryd sydd wedi'i gynllunio yn benodol ar gyfer busnesau sy’n dechrau o’r newydd, ystyriwch a fydd yn diwallu eich anghenion yn y dyfodol. Mae rhai darparwyr yn gosod terfynau, fel capio refeniw blynyddol o £1 miliwn. Os yw eich pecyn cyflwyno yn rhagweld £2 filiwn erbyn blwyddyn tri, mae'n werth adolygu eich trefniadau bancio nawr i osgoi cymhlethdodau yn ddiweddarach. Mae dechrau gyda'r seilwaith ariannol cywir yn helpu i feithrin hyder buddsoddwyr ac yn cefnogi twf llyfnach.
3. Parodrwydd masnachol
Cael cwsmeriaid sy'n talu neu drosoledd
Gall hyd yn oed ychydig o fabwysiadwyr cynnar ddilysu eich syniad a gwella eich prisiad.
Gwisgwch eich ‘het’ werthu
Bydd angen i chi werthu eich gweledigaeth i gyd-sylfaenwyr, cwsmeriaid a buddsoddwyr , felly mae'n syniad da dechrau ymarfer cyn gynted â phosibl.
4. Parodrwydd technegol a chyfreithiol
Sicrhewch bod eich cynllun busnes yn gwbl gadarn
Byddwch yn onest, yn drylwyr, ac yn realistig. Fel rhan o'r broses gyfreithiol o fuddsoddi, disgwylir i chi ddarparu gwarantau yn cadarnhau bod yr holl wybodaeth rydych chi wedi'i darparu yn wir ac yn gywir hyd eithaf eich gwybodaeth.
Adeiladwch fodel ariannol cadarn
Dylai eich model ddangos yn glir sut y byddwch chi'n defnyddio'r buddsoddiad, pa mor hir y bydd yn para, sut olwg sydd ar lwyddiant, a'r prif ysgogiadau sy'n sbarduno twf a phroffidioldeb. Bydd buddsoddwyr yn defnyddio'ch model i asesu nid yn unig y cyfle, ond hefyd eich dealltwriaeth o'r niferoedd. Os ydych chi'n bwriadu codi rownd ddilynol (fel y mae llawer o gwmnïau newydd yn ei wneud), byddant hefyd yn ei ddefnyddio fel meincnod i werthuso'ch perfformiad yn erbyn eich cynllun gwreiddiol.
Cynhyrchwch set dda o gyfrifon rheoli
Mae cyfrifon cyfredol yn hanfodol. Mae angen i fuddsoddwyr ddeall eich sefyllfa ariannol cyn ymrwymo.
Rhowch eich cynnyrch drwy’r felin.
Mynnwch gael adborth gan gynifer o ddefnyddwyr go iawn â phosibl. Byddwch yn barod am ddiwydrwydd dyladwy technegol a chwestiynau anodd.
Trefnwch eich tabl cyfalafu
Bydd buddsoddwyr yn disgwyl i chi roi eich tabl cyfalafu presennol iddyn nhw. Byddan nhw eisiau gweld fersiwn glir, gyfoes sy'n cynnwys yr holl fuddsoddiadau blaenorol, hyd yn oed rhai anffurfiol gan ffrindiau neu deulu. Dylech chi allu modelu sut y bydd rowndiau buddsoddi neu byllau opsiynau yn y dyfodol yn effeithio ar berchnogaeth a gwanhau.
Trosglwyddo'r eiddo deallusol i'r cwmni
Rhaid i unrhyw eiddo deallusol (ED) fod yn eiddo i'r cwmni, nid unigolion na phrifysgolion. Felly, os ydych chi'n gwmni sy'n deillio o brifysgol, yna mae'n debyg y bydd angen i chi daro bargen gyda'r brifysgol i gael yr hawliau ED wedi'u haseinio i'ch busnes. Yn yr un modd, dylid trosglwyddo unrhyw batentau, dyluniadau, hawlfreintiau, neu nodau masnach sydd wedi'u cofrestru yn eich enw personol yn ffurfiol i'r cwmni. Fel arfer, bydd buddsoddwyr yn gofyn i berchnogaeth lawn o'r ED aros gyda'r cwmni cyn rhyddhau unrhyw arian, felly mae'n syniad da dechrau'r broses hon yn gynnar.
5. Marchnad a thirwedd gystadleuol
Dewch i ddeall maint eich marchnad a'ch potensial twf drwyddo draw
Mae buddsoddwyr eisiau gweld cyfle digon mawr i gyfiawnhau eu buddsoddiad.
Dewch i adnabod eich cystadleuwyr
Byddwch yn onest ac yn dryloyw ynglŷn â sut mae eich cynnig yn cymharu ag eraill yn y farchnad. Mynegwch yn glir beth sy'n eich gwneud chi'n wahanol ac esboniwch pam mae'r gwahaniaethau hynny'n eich rhoi mewn sefyllfa dda i lwyddo.
Dylech gael strategaeth gyfarwydd i fynd i'r farchnad.
Dangoswch sut y byddwch chi'n caffael ac yn cadw cwsmeriaid a pha sianeli y byddwch chi'n eu defnyddio.
6. Addasrwydd buddsoddwyr a strategaeth codi arian
Ymchwiliwch i fuddsoddwyr posibl
Mae gan angylion, cyfalafwyr menter, buddsoddwyr corfforaethol, a chyflymyddion ddisgwyliadau gwahanol, felly mae'n bwysig teilwra'ch dull gweithredu.
Paratowch eich deunyddiau cyflwyno
Mae pecyn cyflwyno deniadol yn offeryn hanfodol pan fyddwch chi'n codi buddsoddiad. Gall cael ystafell ddata - storfa ddiogel ar-lein sy'n cynnwys dogfennau busnes allweddol - yn barod hefyd gyflymu'r broses codi arian.
Byddwch yn barod ar gyfer diwydrwydd dyladwy.
Sicrhewch fod eich dogfennau cyfreithiol, ariannol a gweithredol wedi'u trefnu a'u bod yn hygyrch.
Dewch i ddeall disgwyliadau buddsoddwyr
Mae'r rhan fwyaf o fuddsoddwyr yn chwilio am elw, fel arfer trwy ymadael. Byddwch yn glir ynghylch eich gweledigaeth hirdymor. 
Peryglon cyffredin
Cyn i chi ddechrau'r broses codi arian, mae'n helpu gwybod beth i'w ddisgwyl. Dyma rai peryglon cyffredin a all ddal sylfaenwyr yn ddiarwybod:
Tanamcangyfrif yr amser mae'n ei gymryd
Yn aml mae codi arian yn cymryd mwy o amser na'r disgwyl, fel arfer 6 i 12 mis. Gall cynllunio ymlaen llaw eich helpu i ganolbwyntio ac osgoi pwysau diangen.
Gorbrisio'r syniad, tanbrisio'r gweithrediad
Anaml y bydd buddsoddwyr yn cefnogi syniadau ar eu pen eu hunain. Maent yn chwilio am dimau cryf, trosoledd clir, a'r gallu i weithredu.
Dealltwriaeth ariannol wan
Byddwch yn barod i esbonio eich elw, eich cyfradd losgi, a'ch rhedfa. Mae dealltwriaeth gadarn o'ch niferoedd yn meithrin hygrededd a hyder.
Cyflwyniad marchnata ‘un maint yn ffitio bawb’
Mae gan bob buddsoddwr flaenoriaethau gwahanol. Mae teilwra'ch cyflwyniad yn dangos eich bod wedi gwneud eich gwaith cartref ac yn deall eu persbectif.
Paratoi’n wael ar gyfer diwydrwydd dyladwy
Gall dogfennau coll neu gofnodion anhrefnus arafu pethau neu godi baneri coch. Mae cael eich deunyddiau cyfreithiol, ariannol a gweithredol yn barod yn dangos proffesiynoldeb ac yn meithrin ymddiriedaeth.
Meddyliau terfynol
Nid yw parodrwydd buddsoddwyr yn ymwneud â thicio blychau yn unig . Mae'n ymwneud ag adeiladu busnes sy'n gyllidadwy, yn raddadwy, ac yn gymhellol. P'un a ydych chi'n codi eich rownd gyntaf neu'n paratoi ar gyfer Cyfres A, gall cymryd yr amser i asesu eich parodrwydd arbed amser a chyfleoedd a gollwyd i chi.
Defnyddiwch y canllaw hwn fel man cychwyn, ond peidiwch â mynd ar y daith ar eich pen eich hun. Gofynnwch am adborth, siaradwch â sylfaenwyr eraill, ac ystyriwch weithio gyda chynghorwyr neu gyflymyddion a all eich helpu i fireinio'ch dull gweithredu. Gyda'r meddylfryd a'r gefnogaeth gywir, byddwch mewn gwell sefyllfa i lywio'r daith a gwneud achos cryfach dros fuddsoddi.
I gael rhagor o wybodaeth am y cyllid a ddarparwn i fusnesau technoleg Cymru, edrychwch ar ein tudalen buddsoddi mewn technoleg.
