Gareth Mayhead

Rydw i’n canolbwyntio ar fuddsoddiadau ecwiti ar gyfer cwmnïau yng Nghymru, neu’r rheini sy’n adleoli, sydd â safbwynt technoleg cryf gyda photensial sylweddol i dyfu. Fy mhrif feysydd arbenigedd yw rheoli, strategaeth a masnacheiddio eiddo deallusol. 

Er bod gen i brofiad eang iawn o dechnoleg, mae gen i ddiddordeb mawr mewn technolegau glân, atebion ynni a symud oddi wrth danwydd ffosil. Rydw i wedi fy lleoli yng ngogledd Cymru ac er fy mod yn edrych ar gyfleoedd buddsoddi ar draws Cymru gyfan, rydw i’n arbennig o awyddus i weithio gyda busnesau technoleg uchel yn y canolbarth a’r gogledd.

Cyn ymuno â Banc Datblygu Cymru, treuliais dros 10 mlynedd yn rheoli trosglwyddo technoleg mewn prifysgolion (Abertawe a Bangor). Rydw i wedi helpu i fasnacheiddio ystod eang o dechnolegau drwy nodi, gwerthuso a rheoli eiddo deallusol. Rydw i wedi arwain y gwaith o weithredu cytundebau gyda dros 10 cwmni newydd sy’n deillio o brifysgolion. O ganlyniad, rydw i’n hen law ar negodi a dod o hyd i atebion cain i daro bargen. Rydw i wedi eistedd ar fyrddau nifer o gwmnïau sy’n seiliedig ar dechnoleg. 

Cyn dechrau trosglwyddo technoleg, treuliais chwe blynedd ym Mhrifysgol California Berkeley fel arbenigwr biomas. Cyn hyn, roedd gen i rolau’n amrywio o ymchwil a datblygu contractau ym maes gwyddor ffibr i ddatblygu economaidd a rheoli grantiau.