Banc Datblygu yn cefnogi Allbryniant Rheolwyr ar gyfer grŵp busnes teuluol o Abertawe

Mae mab wedi cymryd perchnogaeth o fusnesau ei rieni, gyda chefnogaeth benthyciad o £240,000 gan Fanc Datblygu Cymru, trwy Gronfa Buddsoddi Hyblyg Cymru.

Wedi'i sefydlu ac yn eiddo i Phil ac Amanda Hardman, dechreuodd Electronic Services (Wales) Ltd fel siop atgyweirio teledu yn Uplands, Abertawe ar ddechrau'r 2000au. Dros y blynyddoedd, mae wedi datblygu i fod yn arbenigwr mewn atgyweirio offer cartref fel setiau teledu, rhewgelloedd oergell, peiriannau golchi dillad a pheiriannau sychu dillad.

Mae'r cwmni wedi ehangu ei wasanaethau i gynnwys atgyweiriadau nwyddau gwyn eraill, gan arwain at eu hadleoli i adeilad mwy yn Fforestfach. Heddiw, mae Electronic Services (Wales) Ltd yn gwneud atgyweiriadau trwyddedig sydd o fewn gwarant ar gyfer nifer o gwmnïau electroneg mawr, gan gynnwys Samsung.H3 Group, sydd hefyd wedi'i sefydlu ac yn eiddo i Phil ac Amanda Hardman, sy'n arbenigo mewn gosod a chynnal a chadw systemau tân a diogelwch electronig.

Yn 2018, ymunodd eu mab Daniel â'r tîm rheoli. Yn dilyn yr allbryniant diweddar, mae bellach wedi cymryd rôl Rheolwr Gyfarwyddwr y ddau fusnes, ac mae hefyd wedi ychwanegu cangen newydd i'r busnes ar ffurf H3 Electrical a Solar.

Dywedodd Daniel: “Mae’n anrhydedd i mi barhau â gwaddol fy rhieni ac arwain Electronic Services (Wales) Ltd a H3 Group i’r dyfodol.

“Gyda chefnogaeth Banc Datblygu Cymru, rydym mewn sefyllfa gref i ehangu ein gweithrediadau a pharhau i ddarparu gwasanaeth eithriadol i’n cleientiaid tra hefyd yn cadw’r gwerthoedd a’r safonau uchel sydd wedi bod yn sylfaen i’n llwyddiant. Gall fy rhieni gamu'n ôl nawr ar ôl blynyddoedd o waith caled yn rhedeg ac ehangu'r busnesau.

“Mae’r gefnogaeth rydw i wedi’i chael gan Fanc Datblygu Cymru wedi bod yn wych ac rwy’n falch iawn bod yr allbryniant rheolwyr hwn wedi mynd yn esmwyth.”

Dywedodd John Babalola, Swyddog Buddsoddi Cynorthwyol gyda Banc Datblygu Cymru: “Rydym yn falch iawn o gefnogi Daniel i gaffael H3 Group ac Electronic Services (Wales) Limited. Mae'r Allbryniant Rheolwyr yn garreg filltir arwyddocaol i'r ddau fusnes, gan sicrhau parhad a chadw swyddi.

“Mae gan Daniel gyfoeth o brofiad ar ôl bod yn ymwneud â rheoli’r busnes ers tro. Disgwylir i’r newid hwn gynnal y safonau uchel a’r berthynas gref â chwsmeriaid y mae’r ddau gwmni’n adnabyddus amdanynt, tra hefyd yn dod â gweledigaeth ac egni ffres i’r busnesau.”

“Mae Banc Datblygu Cymru yn barod i gefnogi Allbryniannau Rheolwyr mewn busnesau ledled Cymru, gan helpu perchnogion hir sefydlog i gamu’n ôl ac ymddeol, a thimau rheoli profiadol i gamu i fyny a chymryd perchnogaeth.”