Mae ateb Cymru i Willy Wonka yn ehangu cynhyrchiant gydag agoriad ffatri newydd, gyda chefnogaeth benthyciad o £150,000 gan Fanc Datblygu Cymru a £114,000 gan gyd-fuddsoddwyr o Lannau Mersi, Bathgate Business Finance.
Mae Richard Holt, perchennog siocledi Mr Holt, yn gyn-gogydd crwst ac yn seren y rhaglen crwst S4C Yr Academi Felys (The Sweet Academy). Mae wedi rhedeg y ffatri siocled a chaffi mewn hen felin ym Melin Llynon, ger Llanddeusant ar Ynys Môn. Mae wedi bod yn creu a mireinio detholiad poblogaidd o Siocledi Cymreig, ynghyd ag amrywiaeth unigryw brand o ddonuts o dan y llysenw - mônuts.
Mae benthyciad o £150,000 gan Fanc Datblygu Cymru, £84,000 o lyfr ariannu Bathgate Business Finance ei hun, Bathgate Capital, a £30,000 pellach a frocerwyd gan Bathgate gan ariannwr arbenigol, bellach yn galluogi Richard i ehangu’r cynhyrchiad siocled gyda ffatri sydd newydd ei hadnewyddu yn Llangefni, sydd gerllaw. Bydd peiriannau newydd a gwell yn galluogi Mr Holt i gwrdd â'r galw cynyddol.
Mae Richard yn hyderus y bydd y ffatri newydd, sydd â mwy o arwynebedd llawr na’r hen gyfleuster cynhyrchu ym Melin Llynon, yn caniatáu i’r busnes gael ei siocledi allan i fwy o rai sy’n awchu am y siocledi nag erioed o’r blaen.
Dyma’r eildro i’r busnes dderbyn cymorth gan y Banc Datblygu, yn dilyn benthyciad cychwynnol o £30,000 yn 2019.
Dywedodd Richard: “Rydym wedi gweld cymaint o lwyddiant yn ystod y blynyddoedd diwethaf, ac roeddem am wneud yn siŵr ein bod yn gallu ateb y galw cynyddol hwnnw drwy adeiladu ein gallu a chymryd adeiladau cynhyrchu mwy newydd, mwy o faint. Mae’r ffatri newydd yn Llangefni yn union yr hyn yr oedd ei angen arnom, tra hefyd yn caniatáu i ni barhau i wneud siocled yn lleol a chadw swyddi pwysig ar Ynys Môn.
“Rydym mor falch o’r gefnogaeth a gawsom gan Fanc Datblygu Cymru a’n cyd-fuddsoddwyr Bathgate – mae’n caniatáu i ni ehangu ein gweithrediadau ar yr union adeg iawn.”
Dywedodd Andrea Richardson, Uwch Swyddog Portffolio gyda Banc Datblygu Cymru: “Roedd yn bleser gweithio gyda Richard a’r tîm yn Mr Holt’s. Mae ganddyn nhw frand Cymreig nodedig gyda chynnyrch poblogaidd, ac mae eu siocledi unigryw yn golygu bod galw mawr amdano ledled y DU a thu hwnt.
“Rydym yn falch o fod wedi eu cefnogi wrth iddynt geisio manteisio ar gyfleoedd newydd diolch i’w proffil sy’n tyfu’n gyflym. Dymunwn y gorau iddynt wrth iddynt barhau â’u cynlluniau ar gyfer y dyfodol.”
Dywedodd Tracey Hamilton, BDM o Bathgate Business Finance: “Mae Richard, ei deulu a’i dîm o siocledwyr wedi creu cynnyrch rhagorol sydd eisoes yn rhan annatod o roddion Cymreig ac y mae galw mawr amdano o leoedd pellach i ffwrdd hefyd.
“Mae llawer iawn o greadigrwydd a dychymyg wedi mynd i mewn i ddatblygu brand melysion, ac mae safle’r ffatri yn atyniad gwych a deniadol hefyd, gydag ystafell ddianc ar thema ffatri siocled a gweithgareddau i ddenu ymwelwyr i’r ardal hefyd.
“Nid yn unig y mae Richard wedi datblygu cynnyrch unigryw a blasus, ond mae hefyd wedi creu swyddi i bobl leol ac wedi darparu moethusrwydd fforddiadwy i’w gwsmeriaid. Dymunwn bob lwc i Richard a’r tîm cyfan a byddwn yn sicr yn bwyta danteithion Mr Holt i ddathlu!”
Daeth benthyciad Banc Datblygu Cymru ar gyfer Mr Holt's o Gronfa Buddsoddi Hyblyg Cymru. Mae'n cynnig cyllid ar gyfer bargeinion rhwng £25,000 a £10 miliwn, gyda benthyciadau, cyllid mesanîn a buddsoddiadau ecwiti ar gael. Daw’r cyllid o £84,000 gan Bathgate Business Finance, o’i lyfr ariannu ei hun, Bathgate Capital, a gyrhaeddodd swm nodedig o £5 miliwn mewn benthyca cyfalaf ym mis Mawrth 2025, yr uchaf yn hanes 34 mlynedd y cwmni.
I gael rhagor o wybodaeth, ewch i weld www.bancdatblygu.cymru a bathgatebf.co.uk
