Mae Banc Datblygu Cymru wedi arwain rownd o £1.75 miliwn mewn cwmni biotechnoleg sy'n gweithio ar hyn o bryd ar ddangos math newydd o gyffur i drin clefyd cardiofasgwlaidd.
Mae Argonaute RNA Ltd yn fusnes biotechnoleg sy'n datblygu cyffuriau targedu genynnau i drin math prin o glefyd y galon a elwir yn golesterolemia teuluol difrifol (neu cyfeirir ato yn y maes fel FH yn gryno yn aml). Mae Argonaute gynlluniau hir dymor i ddefnyddio cyffuriau tebyg i fynd i'r afael â chyflyrau cyffredin.
Yn ôl Sefydliad Prydeinig y Galon, mae tua 270,000 o bobl yn y DU yn dioddef o FH. Gall fod yn gyflwr difrifol o blentyndod ac, os na chaiff ei drin, gall y lefelau uchel iawn o golesterol a achosir gan FH leihau disgwyliad oes yn sylweddol trwy ymchwyddo'r rhydwelïau'n gyflym, gan gynyddu'r risg o drawiadau ar y galon a strôc, hyd yn oed mewn plant neu oedolion ifanc.
Mae'r driniaeth bresennol yn cynnwys ymweliadau ysbyty rheolaidd i gael braster wedi'i hidlo'n fecanyddol o'r gwaed. Os bydd yn llwyddiannus, bydd y cyffur newydd yn lleihau'n sylweddol yr angen am driniaethau mwy ymyriaethol.
Mae’r hyn mae Argonaute yn ei wneud yn fath o gyffur i drin FH, a elwir yn oligonucleotid, sy'n defnyddio llinynnau byr o RNA a DNA. Mae hon yn driniaeth therapiwtig cenhedlaeth nesaf, a nodwyd gan lywodraeth y DU fel un sydd â'r potensial i drin afiechydon a adnabyddir fel rhai “anghyffuradwy” ar hyn o bryd.
Mae Argonaute bellach wedi symud ei bencadlys i Gaerdydd, yn rhannol i fod yn agosach at CatSci, ei bartner gweithgynhyrchu. Mae'r ddinas yn prysur ddod yn fan ganolbwynt yn y DU ar gyfer buddsoddiad sector preifat mewn gweithgynhyrchu oligonucleotid, gyda'r gwneuthurwr Cytiva yn agor ffatri a chyfadeiladau labordai newydd yng Nghaerdydd yn 2022.
Mae CatSci yn stori o lwyddiant lleol sy’n tyfu’n gyflym ac sy’n arbenigo yn y cemeg gymhleth sydd ei angen wrth ddatblygu cyffuriau ac adeiladodd ei gyfleuster synthesis oligonucleotid ei hun yn ei ganolfan ar Barc Busnes Prifddinas Caerdydd yn 2023. Cafodd CatSci hefyd fudd o gyllid gan Fanc Datblygu Cymru yn gynharach yn ei hanes, gan gynnwys buddsoddiad o £150,000 gan Gronfa Busnes Cymru yn 2019.
Cefnogodd y Banc Datblygu y cylch buddsoddi yn Argonaute gyda £750,000 mewn ecwiti o Gronfa Buddsoddi Hyblyg Cymru, gyda buddsoddiad pellach o £1m gan bartneriaid yn cynnwys Empirical Ventures, The Fink Family Office a Bristol Private Equity Club.
Dywedodd Tom Davies, Swyddog Buddsoddi Cynorthwyol gyda Banc Datblygu Cymru: “Mae’r cyffuriau newydd sy’n cael eu treialu gan Argonaute yn dangos potensial anhygoel – nid yn unig o ran trin cyflwr etifeddol prin, ond hefyd yn fwy cyffredinol i dargedu ystod ehangach o gyflyrau cardiofasgwlaidd.”
“Mae cefnogaeth arbenigol Empirical Ventures fel cyd-fuddsoddwyr yn golygu bod y cwmni mewn sefyllfa dda i fynd â’i brif gyffur drwodd i dreialon clinigol a denu cyllid pellach gan fuddsoddwyr sy’n arwain y diwydiant. Rydym yn falch bod ein hyder yn y busnes wedi gallu ysgogi cefnogaeth buddsoddwyr pellach o bob rhan o'r DU.”
Meddai Johnathan Matlock, sylfaenydd Empirical Ventures: “Mae cymhwyso therapïau tawelu aml-genyn yn dangos potensial enfawr mewn ystod o fynegyddion a chredwn fod gan Argonaute y llwyfan perffaith i greu asedau a all ‘fynd i mewn i’r clinig’ clefyd cardiofasgwlaidd.”
Meddai Mike Khan, Prif Weithredwr Argonaute : “Rydym yn ddiolchgar am gefnogaeth y Banc Datblygu ac yn gyffrous i fod yn rhan o’r hyn sy’n digwydd ym maes oligonucleotide yng Nghaerdydd. Ein nod yw mynd â’n prif gyffur i dreialon a dangos pa wahaniaeth enfawr y gallwn ei wneud i fywydau cleifion, gan gynnwys y rhai sy’n dioddef o FH difrifol yma yng Nghymru.”
