Motomec Aberdâr yn sicrhau twf hirdymor gyda phrynu safle

Mae gweithdy MOT, gwasanaeth ac atgyweirio hirsefydlog yn Aberdâr wedi cryfhau ei ddyfodol, cadw swyddi a chreu platfformn ar gyfer twf pellach ar ôl prynu ei safle masnachu gyda chefnogaeth gan Fanc Datblygu Cymru.

Mae Motomec Aberdare Ltd wedi defnyddio benthyciad chwe ffigur gan Gronfa Buddsoddi Hyblyg Cymru i brynu'r eiddo gan y cyn-berchennog Eddie Hawkins, a sefydlodd y busnes ym 1987. Mae'r buddsoddiad yn rhoi mwy o reolaeth i'r cwmni ac yn cefnogi ei gynlluniau twf hirdymor.

Mae'r pryniant yn adeiladu ar broses olyniaeth gynharach a gefnogwyd gan y Banc Datblygu, a alluogodd y Cyfarwyddwyr Alex Sage a Carl Adams i gwblhau pryniant rheoli yn 2022.

Dechreuodd y ddau eu gyrfaoedd yn Motomec fel prentisiaid cyn cymryd perchnogaeth o'r busnes gan Eddie. Cadwodd eu hallbryniant rheolwyr gyflogwr a darparwr gwasanaeth lleol dibynadwy mewn perchnogaeth Gymreig, gan roi'r sefydlogrwydd i'r busnes barhau i fuddsoddi. Ers hynny, maent wedi cynyddu trosiant a phroffidioldeb ac wedi adeiladu cronfeydd wrth gefn cryf i gefnogi twf yn y dyfodol.

Heddiw, mae Motomec yn gwasanaethu sylfaen cwsmeriaid ffyddlon ledled Cwm Cynon a thu hwnt ac yn darparu gwasanaethau cynnal a chadw cerbydau dan gontract ar gyfer sefydliadau gan gynnwys Tesco, BT, Co-op Funeralcare a'r RAC. Mae bod yn berchen ar eu hadeiladau bellach yn rhoi mwy o ddiogelwch hirdymor i Motomec a sylfaen gryfach i ehangu ohoni.

Dywedodd Alex Sage, cyfarwyddwr Motomec Aberdare Ltd:

"Mae prynu'r safle yn garreg filltir bwysig i ni ac yn rhoi hyder gwirioneddol i ni yn nyfodol y busnes. Heb y gefnogaeth a gawsom gan Fanc Datblygu Cymru, ni fyddai hyn wedi bod yn bosibl."

"Pan oedd Eddie yn edrych i ymddeol, roedd risg wirioneddol y gallai'r busnes fod wedi diflannu'n gyfan gwbl. Yn lle hynny, rydym wedi gallu amddiffyn y busnes, parhau i gefnogi swyddi lleol ac adeiladu ar bopeth a gyflawnwyd dros y pum degawd blaenorol."

"Mae'r buddsoddiad diweddaraf hwn yn helpu i baratoi Motomec ar gyfer y dyfodol ac yn rhoi'r llwyfan inni barhau i symud ymlaen. Rydym yn hynod ddiolchgar i'n cwsmeriaid am eu teyrngarwch a'u cefnogaeth barhaus oherwydd eu hymddiriedaeth yw'r rheswm pam ein bod ni yn y sefyllfa hon heddiw."

Dywedodd Jill Allen, Swyddog Portffolio gyda Banc Datblygu Cymru:

"Mae Alex a Carl wedi adeiladu ar y sylfeini cryf a sefydlwyd gan Eddie Hawkins ac wedi dangos ymrwymiad clir i'w cwsmeriaid, eu gweithlu a'r gymuned leol. Ers caffael y busnes yn 2022, maent wedi cyflawni twf parhaus ac wedi cynnal sefyllfa ariannol gref."

"Mae prynu'r safle nawr yn rhoi mwy o sefydlogrwydd iddynt, yn sicrhau ased lleol pwysig ac yn darparu llwyfan cadarn ar gyfer ehangu yn y dyfodol. Rydym yn falch o fod wedi cefnogi Alex a Carl eto wrth iddynt barhau i fuddsoddi yn llwyddiant hirdymor Motomec."

Wedi'i ariannu gan Lywodraeth Cymru, mae Cronfa Buddsoddi Hyblyg Cymru gwerth £500 miliwn yn cefnogi busnesau Cymru gyda thelerau hyd at 15 mlynedd. Mae benthyciadau, cyllid mesanîn, a buddsoddiadau ecwiti ar gael o £25,000 i £10 miliwn.