Mae Spotnails yn fewnforiwr a dosbarthwr offer diwydiannol, hoelion a ffasneri sydd wedi'u lleoli yng Nghaerffili sy'n gwasanaethu'r sector adeiladu yn y DU.‑
Ac yntau wedi bod yn gweithredu ers dros 70 mlynedd, mae'r cwmni wedi datblygu presenoldeb cryf yn y diwydiant, gan gyfuno treftadaeth hirhoedlog ag uchelgais i dyfu ac arallgyfeirio. Mae ei dwf nid yn unig yn dangos mynediad at gyfalaf, ond manteision dull ariannu hirdymor, sy'n seiliedig ar berthnasoedd, sy'n atgyfnerthu sefydlogrwydd a chynnydd cynaliadwy.
Rheolaeth
Fe wnaeth y Rheolwr Gyfarwyddwr Craig Bates gaffael y busnes yn wreiddiol mewn allbryniant rheoli (AllRh) yn 2019 gyda chefnogaeth y Banc Datblygu. Ers hynny, mae wedi arwain Spotnails trwy gyfnod o gryfhau gweithredol, ehangu i gyfleusterau newydd, cyflogi mwy o bobl, a lansio platfform e-fasnach newydd.
Pwrpas y busnes
Mae'r cwmni'n cefnogi'r sector adeiladu drwy gyflenwi offer cau / ffasneri a nwyddau traul hanfodol, gan ddarparu dosbarthiad dibynadwy i gontractwyr a defnyddwyr diwydiannol ledled y DU. Mae ei ehangiad parhaus - gan gynnwys symud i warws mwy a gwelliannau gwasanaeth - yn adlewyrchu ymrwymiad i dwf parhaus, gwell effeithlonrwydd a chynnig cryfach i gwsmeriaid. Mae hyn yn cyd-fynd â phatrwm ehangach a welir ar draws busnesau Cymru lle gall cyfalaf amyneddgar helpu i drosi gwelliannau gweithredol yn dwf cynaliadwy, hirdymor.
Gweithio gyda ni (Cyllid)
Dyddiad y rownd ariannu ddiweddaraf: cyfnod 2024/25 (o gyd-destun datganiad i'r wasg)
Maint: benthyciad o £1.2 miliwn
Cronfa: Cronfa Buddsoddi Hyblyg Cymru
Partnerodd Banc Datblygu Cymru â HSBC UK i ddarparu pecyn ariannu cyfun o £3 miliwn, yn cynnwys £1.2 miliwn gan y Banc Datblygu a £1.7 miliwn gan HSBC UK. Caniataodd y cyllid i Spotnails ailgyllido ac ailstrwythuro cyfleusterau presennol - gan gynnwys allbryniant o ecwiti cynharach y Banc Datblygu – tra’n cefnogi'r cam twf nesaf. Mae'r dull hwn yn adlewyrchu sut mae ein cefnogaeth barhaus, a ddarperir ochr yn ochr â strwythuro ariannol disgybledig, yn sicrhau bod gan fusnesau fel Spotnails y lle i barhau i dyfu heb beryglu gwydnwch hirdymor.
Mae hyn yn parhau â phartneriaeth hirdymor rhwng Spotnails a'r Banc Datblygu, yn dilyn y cyfleuster AllRh gwreiddiol o £1.7 miliwn yn 2019 a gwarant ecwiti o £500,000 a gyhoeddwyd yn 2023 i gyflymu cynlluniau ehangu.
Beth mae pobl yn ei ddweud
Craig Bates, Rheolwr Gyfarwyddwr, Spotnails:
“Mae’r Banc Datblygu wedi bod yn dda iawn wrthym ni dros y chwe blynedd diwethaf. Mae’r buddsoddiad ar y cyd newydd hwn gyda HSBC UK yn rhoi’r lle sydd ei angen arnom i barhau i ehangu a dilyn twf cynaliadwy. Roedd angen i ni ailstrwythuro ein cyllid, ac roeddem yn awyddus i gynnal ein cysylltiad â’r Banc Datblygu o ystyried cryfder ein perthynas â nhw hyd yn hyn, a’r gwerth y mae’r berthynas honno wedi’i ychwanegu at ein busnes. Mae’n sefyllfa ‑lle mae pawb ar eu hennill.”
Kabitah Begum, Uwch Swyddog Portffolio, Banc Datblygu Cymru:
“Rydym yn falch bod ein perthynas hirdymor â Spotnails wedi helpu i roi’r busnes mewn sefyllfa gref ar gyfer twf pellach. Mae’r pecyn ariannu ar y cyd hwn â HSBC UK yn ein galluogi i barhau â’n partneriaeth yn dilyn yr hyn a fyddai fel arall wedi dod â chylch buddsoddi llwyddiannus i ben.”
“Mae ein benthyciad o £1.2 miliwn, a ddarparwyd ochr yn ochr â chefnogaeth HSBC UK, yn rhoi’r llwyfan i Spotnails barhau i ehangu, ac rydym yn edrych ymlaen at barhau â’n gwaith gyda nhw fel partner hirdymor, gan ddarparu gwerth sy’n ychwanegol at ein buddsoddiad.”
Donagh Kenny, Rheolwr Perthynas, HSBC UK:
“Mae Spotnails wedi treulio mwy na saith degawd yn meithrin treftadaeth gref yn y sector adeiladu yng Nghymru, felly mae'n wych gallu cefnogi busnes y mae ei hanes hir yn parhau i lunio ei uchelgais ar gyfer y dyfodol.
“Mae’r pecyn ariannu ar y cyd hwn yn rhoi’r lle i’r cwmni barhau i esblygu a buddsoddi gyda hyder. Rydym yn falch o weithio ochr yn ochr â Banc Datblygu Cymru i helpu i yrru’r bennod nesaf o dwf Spotnails.”
Yr effaith
Mae'r cyllid newydd yn atgyfnerthu gallu Spotnails i fuddsoddi mewn twf yn dilyn eu symudiad diweddar i warws mwy, cyflogi staff ychwanegol, a datblygu siop e-lein newydd. Mae'r bartneriaeth rhwng Banc Datblygu Cymru a HSBC UK yn rhoi sefydlogrwydd ariannol hirdymor a lle strategol i'r cwmni, gan alluogi buddsoddiad parhaus, gwelliannau gweithredol ac ehangu'r farchnad.
Mae dull cyfalaf hyblyg ac amyneddgar y Banc Datblygu wedi cefnogi Spotnails trwy ei AllRh, ei raddfa strategol, a'i gyfnod twf presennol, gan sicrhau sylfeini cryfach ar gyfer datblygu cynaliadwy.
