Banc Datblygu yn cefnogi ehangiad dosbarthwr diodydd yn dilyn caffaeliad

Mae buddsoddiad gan Fanc Datblygu Cymru yn helpu’r Cellar Drinks Company i gydgrynhoi gweithrediadau a pharatoi ar gyfer twf yn y dyfodol yn dilyn ei gaffaeliad o Hurns Beer Co, gan sefydlu canolfan ddosbarthu fwy ym Mlaenau Gwent.

Cefnogodd y benthyciad, o Gronfa Buddsoddi Hyblyg Cymru Banc Datblygu, integreiddiad y ddau fusnes, gan alluogi gweithrediadau ar draws Abertawe, Crughywel a Chaerffili i gael eu dwyn ynghyd i un safle yn Nhredegar. Mae'r symudiad wedi cynyddu capasiti warws y busnes, a fydd yn ei dro yn cefnogi cyfeintiau masnachu uwch ac yn creu cyfleoedd ar gyfer prynu swmp wrth i'r busnes cyfun barhau i dyfu. Mae Banc Datblygu wedi cefnogi'r busnes yn ystod ei gamau twf cynharach.

Prynodd Rhys Anstee y Cellar Drinks Company ym mis Ionawr 2021, ar ôl treulio ei oes yn y diwydiant diodydd ar ôl dilyn ei dad i'r maes masnachu hwn. Ynghyd â'i wraig Chyrelle, mae wedi goruchwylio twf y busnes ers hynny, gan arwain at gaffael Hurns Beer Co a symud i'r ganolfan ddosbarthu newydd yn Nhredegar.

Bydd y buddsoddiad yn ariannu symud y warws, uwchraddio systemau, gwaith adeiladu a chynyddu capasiti gweithredol. Bydd hefyd yn cefnogi recriwtio dau aelod o staff telewerthu a thri o yrrwyr lorïau.

Dywedodd Rhys Anstee, cyfarwyddwr Cellar Drinks Company:

"Dyma'n union lle mae angen i ni fod. Mae'n dod â thri safle i mewn i un, ac yn lle cael tri safle gwahanol yn llawn dop, rydyn ni nawr i gyd ar un safle gyda lle i dyfu."

"Mae'r caffaeliad hwn yn rhoi'r raddfa i ni i gynyddu effeithlonrwydd, ehangu ein stoc a gwella'r gwasanaeth a ddarparwn i gwsmeriaid ledled Cymru. Mae dod â'r busnes ynghyd yn Nhredegar yn creu platfform cryf ar gyfer twf yn y dyfodol tra’n cadw ein gwreiddiau'n gadarn yng Nghymru ar yr un pryd."

Dywedodd Aled Robertson, Swyddog Portffolio ym Manc Datblygu Cymru:

"Drwy gefnogi integreiddio Cellar Drinks Company a Hurns Beer Co, rydym yn helpu i greu busnes mwy sy’n fwy cadarn sy'n eiddo i Gymry gyda'r gallu i dyfu, creu swyddi a chadw gwerth yng Nghymru."

"Bydd y symudiad hwn i un ganolfan weithredol yn cynyddu effeithlonrwydd, yn cryfhau gallu dosbarthu'r cwmni ac yn darparu'r sylfeini ar gyfer twf parhaus. Ar ôl cefnogi'r busnes ddwywaith o'r blaen, mae'n wych gweld Cellar Drinks yn parhau i ehangu a buddsoddi ar gyfer y dyfodol."

Wedi'i ariannu gan Lywodraeth Cymru, mae Cronfa Buddsoddi Hyblyg Cymru gwerth £500 miliwn yn cefnogi busnesau Cymru gyda thelerau hyd at 15 mlynedd. Mae benthyciadau, cyllid mesanîn, a buddsoddiadau ecwiti ar gael o £25,000 i £10 miliwn.