Mae Stone Circle Mead yn ehangu'r grefft hynafol o wneud medd, gan ddefnyddio buddsoddiad newydd gan Fanc Datblygu Cymru i gynyddu cynhyrchiant ac ehangu ei ystod o gynhyrchion ymhellach i êl mêl, cwrw a seidrau.
Wedi'i leoli yn Wrecsam, mae Stone Circle Mead wedi derbyn benthyciad o £30,000 gan Gronfa Buddsoddi Hyblyg Cymru i fuddsoddi mewn offer bragu, offer argraffu labeli a labordy yn ei feadfa ar Lôn Rhosnesni. Bydd y buddsoddiad yn helpu'r busnes teuluol i gynyddu maint ei gynhyrchion a dod â chynhyrchion newydd i'r farchnad a chyfarparu'r cwmni ar gyfer allforio.
Wedi'i sefydlu gan y tîm sy’n ŵr a gwraig Tony a Beth Cornish, mae Stone Mead Circle yn cynhyrchu amrywiaeth o fedd traddodiadol a medd â blas wedi ychwanegu ato, gan ddefnyddio mêl Cymreig ochr yn ochr â ffrwythau, blodau a pherlysiau sy’n cael ei dyfu a’i gasglu yn lleol. Mae'r cwpl yn gwneud medd traddodiadol trwy ddefnyddio dulliau sy’n anrhydeddu traddodiadau dros y blynyddoedd, ac mae poteli o Fedd Stone Circle yn cael eu stocio gan nifer o gwsmeriaid proffil uchel, gan gynnwys y Senedd, Tŷ'r Cyffredin, yr Ymddiriedolaeth Genedlaethol ac Eglwys Gadeiriol Caer. Mae'r busnes hefyd yn gweithredu siop a theithiau blasu o'i safle cynhyrchu, gan groesawu ymwelwyr i ddysgu am hanes a chrefft hynafol gwneud medd.
Bydd y buddsoddiad diweddaraf hwn yn cefnogi prynu tanciau eplesu ac aeddfedu wedi'u gwneud yn bwrpasol, gan gynyddu'r capasiti cynhyrchu o lestri 220 litr i danciau sy'n gallu dal hyd at 1,500 litr. Bydd y capasiti ychwanegol yn caniatáu i'r busnes gynyddu lefelau stoc yn sylweddol, cyflenwi sylfaen cwsmeriaid sy'n tyfu a lansio ystod newydd o gynhyrchion. Mae'r busnes hefyd yn bwriadu cyflwyno mathau newydd o berlysiau a ffrwythau, gyda chefnogaeth creu gardd berlysiau bwrpasol ar gyfer cyflenwi cynhwysion ar gyfer cynhyrchu yn y dyfodol.
Mae'r buddsoddiad yn dilyn benthyciad blaenorol o £23,000 gan Fanc Datblygu Cymru ddiwedd 2025, a helpodd i ehangu cynhyrchiant a gosod y sylfeini ar gyfer twf parhaus y cwmni.
Dywedodd Tony Cornish, cyd-berchennog cwmni y Stone Circle Mead Company:
"Mae'r galw am ein medd yn parhau i dyfu ac rydym wedi cyrraedd y pwynt lle mae angen capasiti cynhyrchu ychwanegol arnom i ehangu a mynd â'r busnes i'r cam nesaf. Bydd yr offer newydd yn caniatáu i ni gynyddu cynhyrchiant, datblygu cynhyrchion newydd ac archwilio llwybrau newydd i'r farchnad."
"Un o'r pethau sy'n ein gwneud ni'n wahanol yw ein ffocws ar greu medd dilys gan ddefnyddio cynhwysion sy'n adlewyrchu'r dirwedd o'n cwmpas. Mae llawer o'n ffrwythau, blodau a pherlysiau'n cael eu casglu'n lleol neu'n cael eu tyfu ein hunain, ac rydym yn gyffrous i adeiladu ar y dull hwnnw gyda ryseitiau a blasau newydd wedi'u hysbrydoli gan draddodiadau gwneud medd hanesyddol."
Dywedodd Malcolm Green, Swyddog Buddsoddi gyda Banc Datblygu Cymru:
"Mae Stone Circle Mead yn gynhyrchydd Cymreig nodedig gyda stori gref, sylfaen cwsmeriaid ffyddlon a chynlluniau clir ar gyfer twf. Mae'r busnes eisoes wedi dangos sut y gellir trosi buddsoddiad yn gynhyrchiant cynyddol a datblygu'r farchnad."
"Bydd y cyllid diweddaraf hwn yn helpu Tony a Beth i ehangu cynhyrchiad, cryfhau eu cynnig o ran cynnyrch a chyrraedd cwsmeriaid newydd, a hynny tra’n parhau i hyrwyddo crefft draddodiadol â gwreiddiau cryf yng Ngogledd Cymru."
Wedi'i ariannu gan Lywodraeth Cymru, mae Cronfa Buddsoddi Hyblyg Cymru gwerth £500 miliwn yn cefnogi busnesau Cymru gyda thelerau hyd at 15 mlynedd. Mae benthyciadau, cyllid mesanîn, a buddsoddiadau ecwiti ar gael o £25,000 i £10 miliwn.
