Mae Griffiths Waste Management, rhan o’r Gavin Griffiths Group sy'n eiddo i'r teulu, wedi sicrhau benthyciad o £2 filiwn gan Gynllun Benthyciadau Busnes Gwyrdd Banc Datblygu Cymru i gefnogi datblygiad Cyfleuster Ailgylchu Deunyddiau (CAD) newydd sbon.
Mae'r buddsoddiad hwn yn cynrychioli newid sylweddol yng ngallu gweithredol Griffiths Waste Management, gan alluogi cynnydd sylweddol mewn capasiti ailgylchu. Bydd y CAD yn ymgorffori systemau didoli awtomataidd uwch i adfer mwy o ddeunyddiau ailgylchadwy, lleihau halogiad a lleihau faint o wastraff a anfonir i safleoedd tirlenwi. Bydd y prosiect yn diogelu 41 o swyddi presennol wrth greu cyfleoedd cyflogaeth newydd, medrus, gan ategu twf ac arloesedd hirdymor o fewn y busnes.
Darparwyd diwydrwydd dyladwy ariannol gan Rhys Jenkins a Chris Thomas o SME Finance Partners gyda'r prosiect yn rhan o raglen fuddsoddi ehangach gwerth miliynau o bunnoedd sydd hefyd yn cynnwys cefnogaeth gan gronfeydd grŵp a grant gan Lywodraeth Cymru. Mae adeiladu'r cyfleuster newydd bron â'i gwblhau, a disgwylir i'r ffatri ddod yn gwbl weithredol yn 2026.
Wedi'i sefydlu yn 2010, mae Griffiths Waste Management yn rhan o’r Gavin Griffiths Group, busnes Cymreig hirsefydlog sy'n darparu gwasanaethau rheoli gwastraff, ailgylchu, cludiant, agregau, contractio ac adfer tir i awdurdodau lleol, aelwydydd domestig, busnesau a chleientiaid adeiladu ledled Cymru a'r DU.
Gan weithredu o Abertawe, mae Griffiths Waste Management ar hyn o bryd yn prosesu rhwng 25,000 a 30,000 tunnell o wastraff bob blwyddyn. Fodd bynnag, mae ei gyfleuster ailgylchu presennol wedi cyrraedd terfynau capasiti ymarferol, gan gyfyngu ar y trwybwn a faint o wastraff trydydd parti y gellir ei dderbyn.
Bydd y Cyfleuster Ailgylchu Defnyddiau (CAD) newydd yn cynyddu'r capasiti prosesu i hyd at 200,000 tunnell y flwyddyn ac yn defnyddio technolegau didoli awtomataidd uwch i wneud y mwyaf o gyfraddau adfer a darparu allbynnau ailgylchu o ansawdd uchel yn gyson. Drwy wella gwahanu deunyddiau'n sylweddol a lleihau halogiad, bydd y cyfleuster yn trawsnewid sut mae gwastraff yn cael ei brosesu, gan alluogi cyfran fwy o ddeunydd i gael ei adfer a'i farchnata fel nwyddau eilaidd gwerth uchel. Bydd hyn yn lleihau dibyniaeth ar safleoedd tirlenwi, yn gwella effeithlonrwydd adnoddau ac yn chwarae rhan allweddol wrth gefnogi'r newid i economi gylchol ar draws y rhanbarth.
Mae'r buddsoddiad yn cyd-fynd yn agos ag uchelgeisiau Llywodraeth Cymru i leihau tirlenwi a chynyddu cyfraddau ailgylchu. Daeth diwydrwydd dyladwy technegol a gynhaliwyd gan yr Ymddiriedolaeth Garbon i'r casgliad y gallai'r prosiect sicrhau arbedion carbon gydol oes o fwy na 53,000 tunnell o garbon deuocsid cyfatebol ( tCO₂e), gan leihau costau gwaredu gwastraff yn sylweddol a gwella adferiad adnoddau.
Dywedodd Gavin Griffiths, Rheolwr Gyfarwyddwr y Gavin Griffiths Group:
“Mae’r buddsoddiad hwn yn cynrychioli’r cam nesaf yn esblygiad ein busnes ac yn adlewyrchu ein hymrwymiad hirdymor i gynaliadwyedd, arloesedd a’r economi gylchol. Drwy drawsnewid sut mae gwastraff yn cael ei brosesu, bydd y cyfleuster yn chwarae rhan allweddol wrth hyrwyddo'r economi gylchol ledled De Cymru, gan gefnogi targedau cynaliadwyedd cenedlaethol a chyflawni manteision amgylcheddol mesuradwy.
“Fe wnaethon ni gydnabod beth amser yn ôl mai dyfodol rheoli gwastraff yw adfer mwy o ddeunyddiau, lleihau tirlenwi a chynhyrchu cynhyrchion wedi’u hailgylchu o ansawdd uwch y gellir eu hailddefnyddio o fewn diwydiant. Bydd y cyfleuster newydd hwn yn caniatáu i ni wneud yn union hynny.
“Mae Banc Datblygu Cymru wedi bod yn bartner cryf drwy gydol y broses hon. Cymerodd eu tîm yr amser i ddeall ein busnes a manteision amgylcheddol ehangach y prosiect. Mae'r cyllid yn rhoi'r llwyfan inni i ddiogelu'r busnes ar gyfer y dyfodol, diogelu swyddi a chreu cyfleoedd newydd wrth i'r galw am reoli gwastraff cynaliadwy barhau i dyfu.”
“Rwyf yr un mor ddiolchgar i’r cyfarwyddwyr a’r tîm ehangach ar draws Grŵp Griffiths am yr ymdrech, y cynllunio a’r ymroddiad sylweddol a ddangoswyd wrth ddatblygu’r hyn sy’n brosiect gwirioneddol gyffrous — sichrau ei fod yn cyrraedd y cam hwn a’i roi ar waith a helpu i sicrhau dyfodol y busnes.”
Dywedodd Sally Phillips, Swyddog Buddsoddi ym Manc Datblygu Cymru:
“Mae Rheoli Gwastraff Griffiths yn fusnes Cymreig sefydledig sydd â enw da sefydledig a gweledigaeth glir ar gyfer y dyfodol.
“Mae’r buddsoddiad hwn yn cefnogi prosiect sy’n darparu manteision economaidd ac amgylcheddol. Bydd y cyfleuster newydd yn cynyddu capasiti ailgylchu yn sylweddol, yn lleihau dibyniaeth ar safleoedd tirlenwi ac yn cefnogi creu economi fwy cylchol, gan ddiogelu swyddi medrus a chreu llwyfan ar gyfer twf yn y dyfodol.
“Dyma’r union fath o brosiect y cynlluniwyd y Cynllun Benthyciadau Busnes Gwyrdd i’w gefnogi, gan helpu busnesau Cymru i fuddsoddi mewn cynhyrchiant, cynaliadwyedd a chadernid hirdymor.”
Wedi'i ariannu gan Lywodraeth Cymru a Banc Datblygu Cymru, mae'r Cynllun Benthyciadau Busnes Gwyrdd yn cynnig cyfraddau llog gostyngol a chyfalaf amyneddgar i gefnogi busnesau sy'n ymgymryd â phrosiectau effeithlonrwydd ynni a datgarboneiddio yng Nghymru. Mae benthyciadau o £1,000 i £1.5 miliwn ar gael ynghyd â mynediad at gefnogaeth ymgynghori wedi'i hariannu'n llawn ac yn rhannol i gynnal archwiliadau ynni penodol i fusnesau.
