Mae LQ Resorts wedi caffael y Parkway Hotel and Spa gyda benthyciad saith ffigur gan Fanc Datblygu Cymru

Mae LQ Resorts wedi ehangu ei bortffolio yn y DU gyda chaffael Parkway Hotel and Spa yng Nghwmbrân, gyda chefnogaeth benthyciad saith ffigwr gan Fanc Datblygu Cymru.

Mae'r gweithredwr sba a chyrchfannau hirsefydlog, sydd eisoes yn rhedeg tair cyrchfan gan gynnwys ei safle blaenllaw ger ffin Cymru rhwng Croesoswallt a Wrecsam, wedi ychwanegu Parkway Hotel and Spa, sydd ag 80 ystafell, at ei gasgliad. Wedi'i leoli mewn mwy na saith erw, mae'r lleoliad yn gyrchfan boblogaidd ar gyfer seibiannau sba, cynadleddau, priodasau ac arhosiadau hamdden.

Darparwyd cyllid drwy Gronfa Buddsoddi Twristiaeth Cymru. Mae'r busnes eisoes wedi dechrau uwchraddio ar y safle, gan gynnwys offer campfa newydd ac ardal bar wedi'i hadnewyddu, gyda buddsoddiad pellach wedi'i gynllunio.

Dywedodd Colin Jenno, Cyfarwyddwr LQ Resorts: “Roedd y Parkway Hotel and Spa yn addas iawn i ni. Mae ei sba sefydledig a’i enw da lleol cryf yn cyd-fynd yn berffaith â model ein cyrchfan. Rydym yn gwerthfawrogi ei dreftadaeth a redir gan deulu a byddwn yn parhau i rymuso rheolwyr lleol i gynnal y sylfaen cwsmeriaid ffyddlon wrth i ni fuddsoddi mewn twf yn y dyfodol. Sicrhaodd cefnogaeth y Banc Datblygu drawsnewidiad llyfn, gan ganiatáu inni gadw’r tîm presennol a dechrau gwelliannau ar unwaith.”

Dywedodd Clare Sullivan, Rheolwr Rhanbarthol ar gyfer Buddsoddiadau Newydd ym Manc Datblygu Cymru: “Mae LQ Resorts wedi meithrin brand cryf gydag enw da am wasanaeth o’r radd flaenaf yn eu cadwyn bresennol o sbaon, ac mae caffael y Parkway Hotel and Spa yn ychwanegiad gwych at eu portffolio. Rydym yn falch bod ein cefnogaeth wedi eu galluogi i fanteisio ar y cyfle yn gyflym.”

Ychwanegodd: “Hoffem hefyd ddiolch i Chris Thomas o SME Finance am gynghori ar y fargen, ac i James Guile o Hugh James am ddarparu cefnogaeth gyfreithiol.”

Wedi'i ariannu'n llwyr gan Lywodraeth Cymru, mae Cronfa Buddsoddi Twristiaeth Cymru, sy'n werth £50 miliwn, yn cynnig benthyciadau rhwng £100,000 a £5 miliwn ar gyfer prosiectau twristiaeth nodedig ac amlwg sy'n cyd-fynd â blaenoriaethau Llywodraeth Cymru. Gall prosiectau gynnwys cynhyrchion arloesol o ansawdd uchel, atyniadau pob tywydd, profiadau sy'n canolbwyntio ar ymwelwyr Cymreig yn benodol, prosiectau diwylliannol neu dreftadaeth arloesol, lleoedd anarferol i aros ac atyniadau blaenllaw.