Mae'r Banc Datblygu bellach wedi buddsoddi bron i £90m mewn mwy na 290 o fentrau technoleg yng Nghymru, gan gynhyrchu dros £195m mewn cyd-fuddsoddiad gan y sector preifat a chefnogi dros 2,000 o swyddi.
Mae Banc Datblygu Cymru wedi cyhoeddi ffigurau newydd sy'n dangos ei gefnogaeth i'r sector technoleg yng Nghymru, gan gyfuno cyfalaf amyneddgar â chyd-fuddsoddi strategol i hybu arloesedd ar draws y rhanbarth. Mae bellach wedi sianelu bron i £90 miliwn o gyfalaf ac wedi datgloi £195 miliwn pellach gan gyd-fuddsoddwyr i 292 o fentrau technoleg yng Nghymru.
Ar ôl cyfnod tawel a ysgogwyd gan y pandemig, mae buddsoddiad technoleg gan y Banc Datblygu wedi gwella'n gryf, gan ddringo 29% ers 2022 a rhagwelir y bydd 36% yn uwch yn 2025/26 ar sail pro rata. Mae'r taflwybr hwn yn tanlinellu rôl cyfalaf sefydlog, a gefnogir yn gyhoeddus, wrth gataleiddio buddsoddiad preifat ym mentrau potensial uchel y rhanbarth.
Mae archwaeth buddsoddi'r Banc Datblygu yn eang, o ychydig gannoedd o filoedd i sawl miliwn, gan adlewyrchu anghenion busnesau wrth iddynt symud ymlaen o'r cyfnod sefydlu i Gyfres A. Drwy gymryd cyfrannau lleiafrifol a chanolbwyntio ar y camau ffurfiannol hyn, mae Cymru wedi cynnal nifer uchel o fargeinion, gan alluogi sylfaenwyr i dyfu eu busnes heb golli rheolaeth.
Mae'r ystadegau, sy'n cwmpasu'r cyfnod ers ei lansio yn 2017, ar gael erbyn hyn, wrth i Gymru baratoi i gynnal Wythnos Technoleg Cymru (24–26 Tachwedd 2025), lle bydd Banc Datblygu Cymru yn chwarae rhan allweddol.
Mae'r sefydliad cyllid cyhoeddus, sy'n eiddo i Lywodraeth Cymru, yn fwyfwy yn fan galw cyntaf i sylfaenwyr cynnar a buddsoddwyr ar raddfa fawr sy'n awyddus i ymgysylltu ag ecosystem technoleg fywiog y wlad – rhywbeth sydd hyd yn oed yn bwysicach pan fydd buddsoddwyr y sector preifat yn encilio.
Dyna fu’r sefyllfa yn ystod y blynyddoedd diwethaf. Yn ôl Traciwr Ecwiti Busnesau Bach blynyddol diweddaraf Banc Busnes Prydain, a gyhoeddwyd ym mis Mehefin, ledled y DU roedd gostyngiadau yn nifer y bargeinion a gwerthoedd buddsoddiadau. Fodd bynnag, daeth Cymru i’r amlwg fel man disglair prin gyda chyfrolau bargeinion yn codi 7.2% yn 2024 o’i gymharu â 2023. Gwelodd marchnad ehangach y DU ostyngiad o 15.1% mewn gweithgaredd bargeinion ecwiti.
Ond er bod llawer o fuddsoddwyr preifat yn parhau i fod yn ofalus yng nghanol anawsterau economaidd, mae perchnogaeth gyhoeddus y Banc Datblygu yn sicrhau llif cyson, gwrth-gylchol o gyfalaf. Drwy gynnal buddsoddiad yn ystod cyfnodau o ddirywiad, mae'r Banc Datblygu wedi helpu cwmnïau technoleg Cymru i dyfu, arloesi a masnacheiddio syniadau arloesol er gwaethaf marchnad ehangach gythryblus.
Mae wedi cwblhau nifer o fargeinion nodedig eraill yn y sector hwn yn ddiweddar. Ym mis Gorffennaf buddsoddodd yn Amotio, sydd wedi'i leoli yng Nghwmbrân, a gwblhaodd rownd ariannu cyn-sbarduno o £810,000, dan arweiniad buddsoddiad ecwiti o £500,000 gan Fanc Datblygu Cymru. Bydd y cyllid yn cael ei ddefnyddio i ddatblygu technoleg a fydd yn cefnogi gofal ôl-lawfeddygol ac amseroedd adferiad gwell i gleifion llawdriniaeth ar y cymalau ledled y farchnad gofal iechyd fyd-eang.
Cwmni arall sy'n ffynnu diolch i gefnogaeth y Banc Datblygu yw Reacta Healthcare, busnes o Lannau Dyfrdwy sy'n trawsnewid y ffordd y mae alergeddau bwyd yn cael eu diagnosio. Mae'n cyflogi 80 o bobl ac mae ei gynhyrchion yn cael eu cludo i dros 300 o safleoedd treialon clinigol ledled y byd. Ar ôl cefnogi Reacta gyntaf yn 2019, mae'r Banc Datblygu bellach wedi buddsoddi £2.8m mewn ecwiti i helpu'r busnes i ehangu ei gapasiti gweithgynhyrchu ac ymestyn ei bortffolio cynnyrch.
Dywedodd Rebecca Evans, Ysgrifennydd Cabinet Llywodraeth Cymru dros yr Economi, Ynni a Chynllunio:
“Rydym wedi ymrwymo i hyrwyddo diwylliant o arloesi a defnyddio technolegau newydd fel rhan allweddol o’r economi gynhwysol, gynaliadwy a chadarn yr ydym yn ei chyflawni.
“Mae Banc Datblygu Cymru yn chwarae rhan unigryw wrth gefnogi ein harweinwyr digidol a’n busnesau technoleg talentog ac uchelgeisiol i fanteisio ar y cyfleoedd niferus a gynigir gan drawsnewid digidol.
“Drwy hyrwyddo arloesedd a chynyddu ffyniant, maen nhw’n ein helpu i ddarparu swyddi a thwf o ansawdd uchel heddiw ac ar gyfer diwydiannau yfory.”
Dywedodd Duncan Gray, Cyfarwyddwr Buddsoddiadau Menter Technoleg ym Manc Datblygu Cymru:
“Rydym mewn oes o arloesedd. Mae deallusrwydd artiffisial yn creu mwy o syniadau a mwy o fentrau nag erioed o’r blaen – ond mae troi syniadau’n fusnesau cynaliadwy yn gofyn am gefnogaeth sefydlog, cyfalaf a hirdymor gan fuddsoddwyr sy’n mynd y tu hwnt i arian parod. Mewn byd lle gall cyfalaf preifat encilio yn ystod cyfnodau o ddirywiad, mae ein cysondeb yn fantais gystadleuol i Gymru. Rydym yn darparu sefydlogrwydd i sylfaenwyr gyda chyllid sy’n dibynnu ar gryfder yr achos buddsoddi yn hytrach na macroeconomeg ehangach – gan alluogi arloesedd i ffynnu hyd yn oed mewn marchnadoedd heriol.
“Does dim ffiniau i gyfalaf a gall busnesau o’r radd flaenaf yng Nghymru godi arian yn fyd-eang, ac maen nhw’n gwneud hynny. Mae ein dull gweithredu ni yn sicrhau bod sylfaenwyr nid yn unig yn derbyn cyfalaf ond hefyd cefnogaeth strategol a chyfleoedd cyd-fuddsoddi. Am bob £1 a fuddsoddwn mewn busnes technoleg cynnar, rydym yn denu mwy na £1 mewn cyfalaf preifat, effaith lluosogydd sy’n dod â chyllidwyr newydd i Gymru i gryfhau’r ecosystem ac yn tanlinellu ein model sy’n cyfuno pwrpas cyhoeddus â disgyblaeth y sector breifat.”
Fel sefydliad cyllid cyhoeddus sy'n eiddo i Lywodraeth Cymru, mae Banc Datblygu Cymru yn darparu benthyciadau ac ecwiti i fusnesau, pobl a chymunedau Cymru i gefnogi amcanion polisi ehangach y Llywodraeth gan gynnwys y newid i economi carbon isel a datblygu cartrefi newydd ac eiddo masnachol.
Mae gan y Banc Datblygu bellach £2 biliwn mewn cronfeydd dan reolaeth a phortffolio o fwy na 3,600 o gwsmeriaid busnesau bach. Helpodd cyllid dyled ac ecwiti gwerth cyfanswm o £152 miliwn 502 o fusnesau i greu a diogelu 6,185 o swyddi ledled Cymru yn ystod 2024/25. Aeth £8.2 miliwn o'r cyllid hwn i 34 o fentrau technoleg cyfnod cynnar, gan ddenu cyd-fuddsoddiad o £8.6 miliwn.
Ewch i weld bancdatblygu.cymru am ragor o wybodaeth.
