Bydd busnes peirianneg, saernïo a pheiriannu hirsefydlog yn Abertawe, sy’n cael ei redeg gan yr un teulu ers mwy na 40 mlynedd, yn mynd i berchnogaeth newydd, diolch i Fewnbryniant Rheolwyr a ariennir gan ecwiti a gefnogir gan Fanc Datblygu Cymru.
Wedi'i ffurfio ym 1979 gan Mr Anthony Beaujean, roedd Afon Engineering o Abertawe yn cael ei redeg gan Tony, cyn trosglwyddo'r awenau i'w feibion Carl ac Andrew. Ar ôl degawdau o reoli’r busnes, sy’n cyflogi mwy na 50 o bobl yn Llansamlet, mae’r teulu wedi croesawu tîm arwain newydd profiadol.
Yn dilyn benthyciad cymysg o £2.5 miliwn a buddsoddiad ecwiti gan Fanc Datblygu Cymru, drwy Gronfa Olyniaeth Rheoli Cymru a Chronfa Buddsoddi Hyblyg Cymru, bydd tîm rheoli newydd yn cymryd cyfrifoldeb am redeg Afon Engineering.
Mae’r tîm newydd yn cynnwys y Rheolwr Gyfarwyddwr newydd Jason Thomas, gynt o Teddington Engineered Solutions o Lanelli, a Julian Vance-Daniel, sylfaenydd Vessco Engineering o Ben-y-bont ar Ogwr.
Dywedodd Jason Thomas: “Rydym yn falch o fod yn geidwaid newydd i Afon, mae hwn yn achlysur pwysig a balch i ni ac mae gennym fwriadau clir i roi gwybod i’r byd am Afon ar draws llawer o sectorau diwydiant. Gyda’n gilydd, byddwn yn tywys Afon i gyfnod newydd, un sy’n cael ei nodi gan uchelgais a phroffesiynoldeb. Rydyn ni’n credu bod yna bobl eithriadol yn gweithio yn Afon sy’n dangos ymrwymiad ac ymroddiad, sydd wedi bod yn ysbrydoledig i’w weld ac yn rhoi sylfaen wych i ni adeiladu arni.
"Diolch i gefnogaeth amhrisiadwy gan Fanc Datblygu Cymru, rydym yn gyffrous i gamu i mewn a sicrhau trosglwyddiad esmwyth i'r busnes. Nid yn unig ein nod yw cadw etifeddiaeth Afon ond hefyd archwilio cyfleoedd ar gyfer twf a datblygiad ar raddfa fyd-eang.
Cwblhawyd y fargen gan Scott Hughes, Uwch Swyddog Buddsoddi gyda Banc Datblygu Cymru, gyda chefnogaeth Clare Sullivan, Rheolwr Rhanbarthol ar gyfer Buddsoddiadau Newydd.
Dywedodd Scott: “Bydd ein buddsoddiad yn galluogi’r teulu i gamu i ffwrdd o fusnes llwyddiannus y maent wedi gweithio’n galed i’w adeiladu. Mae’r tîm rheoli newydd yn fedrus, gyda hanes cryf, ac mewn sefyllfa dda i gefnogi’r busnes i gyflawni ei dwf arfaethedig yn y dyfodol.”
Cefnogwyd y fargen gan Geldards, yn gweithredu i'r Banc Datblygu, ochr yn ochr â JCP, Azets a Harvey Business Support, yn gweithredu ar ran Afon.
Alex Butler, Partner Corfforaethol yn Geldards : “Roeddem yn falch iawn o weithio gyda Scott a thîm Banc Datblygu Cymru ar y trafodiad hwn. Mae’r buddsoddiad diweddaraf hwn yn dangos ymrwymiad parhaus y Banc Datblygu i gefnogi busnesau Cymru gyda’u cynllunio ar gyfer olyniaeth – gan helpu’r busnesau hynny i sicrhau dyfodol cynaliadwy yma yng Nghymru ar gyfer cenedlaethau’r dyfodol.”
Dywedodd Natalie Jones, Cyfarwyddwr JCP Solicitors: “Rydym wrth ein bodd ein bod wedi cefnogi’r tîm rheoli newydd gyda’u Mewnbryniant Rheolwyr i Afon Engineering ac o fod wedi gweithio gyda Banc Datblygu Cymru ar drafodiad llwyddiannus arall. Rydym wedi treulio'r chwe mis diwethaf yn gweithio'n agos gyda'r tîm rheoli newydd ac rydym yn hyderus y bydd y busnes yn mynd o nerth i nerth o dan eu harweinyddiaeth.
Ychwanegodd Jason Thomas: “Rydym yn ddiolchgar i deulu Beaujean am eu hymroddiad, a’u cefnogaeth trwy gydol y cyfnod pontio hwn, sydd wedi bod yn allweddol i’n paratoi ar gyfer y daith addawol sydd o’n blaenau.”
“Hoffem hefyd ddiolch i’n hymgynghorwyr am eu cefnogaeth yn ystod y broses drafodion, yn enwedig Natalie Jones, Cyfarwyddwr JCP Solicitors, Katherine Broadhurst, Partner yn Azets a Colin Harvey, Cyfarwyddwr Cyllid yn Harvey Business Support, a helpodd ni i gyflawni cwblhau llwyddiannus."
“Gyda’r caffaeliad hwn, rydym wedi ymrwymo i sicrhau dyfodol cryf a chynaliadwy i Afon, gan barhau â’i statws cystadleuol a chynnal ei gysylltiad dwfn â’i weithwyr, cwsmeriaid, cyflenwyr a’r gymuned.”
