Beth yw cyllid ecwiti a sut mae'n gweithio?

Beth yw cyllid ecwiti?

Mae cyllido ecwiti yn golygu gwerthu cyfran yn eich busnes yn gyfnewid am fuddsoddiad arian parod.

Yn wahanol i fenthyciad, nid oes rhwymedigaeth ad-dalu ar gyllid ecwiti. Yn lle, mae buddsoddwyr yn prynu cyfranddaliadau yn y cwmni er mwyn gwneud arian trwy ddifidendau (cyfran o'r elw) neu trwy werthu eu cyfranddaliadau yn y pen draw.

Dim ond os yw'r cwmni'n llwyddiannus y byddant yn cael enillion ar eu buddsoddiad. Mae hyn yn golygu ei bod o fudd iddynt helpu a chefnogi'r tîm rheoli i dyfu'r busnes a’i ddatblygu i'w lawn botensial.

Beth yw manteision cyllid ecwiti?

Efallai y gallwch ddechrau a thyfu eich busnes gan ddefnyddio'ch cynilion personol a'r llif arian a gynhyrchir o werthiannau. Ond yn aml gall hyn gymryd amser hir. Gyda chyllid ecwiti, fe allech chi gynyddu eich graddfa yn llawer cyflymach, sydd yn ei dro yn eich galluogi i ennill mantais gystadleuol mewn marchnadoedd sy'n symud yn gyflym.

Dyma rai o brif fanteision y math hwn o gyllid:

• Rhyddid rhag dyled - Gallwch ganolbwyntio ar eich cynlluniau twf heb faich ad-daliadau benthyciad rheolaidd.
• Mwy o gyfalaf - Yn gyffredinol, gallwch godi symiau mwy o arian gyda chyllid ecwiti nag y gallwch chi gyda chyllid dyled.
• Profiad busnes, sgiliau a chysylltiadau - Bydd rhai buddsoddwyr yn cynnig llawer mwy na dim ond arian. Byddant yn darparu gwerth ychwanegol ar ffurf arbenigedd, gwybodaeth a chysylltiadau, a all helpu i sbarduno twf eich busnes.
• Cyllid dilynol - Mae buddsoddwyr yn aml yn barod i ddarparu cyllid ychwanegol wrth i'ch cwmni dyfu.

Pryd ddylech chi ddefnyddio cyllid ecwiti?

Nid yw cyllid ecwiti yn iawn i bob busnes ac mae wastad yn syniad da gwneud eich ymchwil ar yr holl opsiynau cyllido sydd ar gael. Dyma ychydig o senarios lle gallai fod yn ddull hyfyw:

• Pan rydych chi'n gwmni cam cynnar heb hanes ariannol na sicrwydd cyfochrog i sicrhau benthyciad banc. Mae hyn yn aml yn wir gyda busnesau technoleg newydd a allai fod ag asedau deallusol sylweddol ond ychydig o asedau diriaethol. Efallai eich bod yn y cam cyn-refeniw a bod gennych gostau i'w talu fel costau ymchwil a datblygu. Os oes angen i chi godi swm mawr o arian i roi hwb cychwynnol, yna efallai mai buddsoddiad ecwiti fydd eich dewis gorau neu'ch unig opsiwn.
• Rydych chi'n gwmni sefydledig ac mae gennych chi gynlluniau ar gyfer twf sy'n gofyn am lawer iawn o gyfalaf. Efallai eich bod am ehangu gweithrediadau, symud i farchnadoedd newydd, neu arallgyfeirio cynhyrchion. Gallai gwneud ad-daliadau ar fenthyciad rwystro'ch gallu i dyfu mor gyflym ag yr hoffech chi.
• Rydych eisiau caffael busnes arall neu rydych chi'n rhan o dîm rheoli sy'n bwriadu all-brynu'r perchennog. Mae allbryniant rheolwyr fel arfer yn dibynnu ar gronfeydd yn cael eu cyfuno gyda'i gilydd o sawl ffynhonnell, sydd fel arfer yn cynnwys cyllid ecwiti. 
• Rydych chi am werthu eich busnes. Yn ddelfrydol, bydd eich busnes ar gam ehangu pan fyddwch yn ei roi ar werth. Gallai mynd ati i godi cyllid ecwiti eich helpu i gyflymu twf eich cwmni fel ei fod mor ddeniadol â phosibl i ddarpar brynwyr.

Sut mae cyllid ecwiti yn gweithio?

Fel y soniwyd uchod, gellir defnyddio cyllid ecwiti ar wahanol gamau o'r siwrnai fusnes, p'un a ydych chi newydd gychwyn neu pan rydych chi'n gwmni sefydledig sy'n bwriadu ehangu (gan gynnwys caffael). Bydd rhai busnesau yn codi sawl rownd o gyllid ecwiti gan wahanol fathau o fuddsoddwyr wrth iddynt symud ymlaen o fod yn gwmni sydd newydd ddechrau i fod yn gwmni llwyddiannus.

Pan fyddwch chi'n codi cyllid ecwiti bydd y buddsoddwr yn berchen ar ran o'ch cwmni. Ond trwy gymryd buddsoddiad dylech allu creu busnes o faint mwy, sy'n fwy proffidiol. Gyda'r buddsoddwr cywir, byddwch nid yn unig yn cael chwistrelliad arian parod ond hefyd yr arbenigedd a'r cysylltiadau i yrru'ch busnes yn ei flaen. A fyddai’n well gennych fod yn berchen ar 100% o gwmni £100k neu 70% o gwmni £1 miliwn?

Mae ymchwil gan Beauhurst ar funsesau yn cynyddu eu graddfa yn 2019 yn dangos bod cwmnïau â thwf trosiant uwch yn fwy tebygol o fod wedi sicrhau buddsoddiad ecwiti. Roedd 56% o'r rhai a dyfodd drosiant o fwy na 100% yn defnyddio cyllid ecwiti.

Gall cyllid ecwiti ddod o amrywiaeth o ffynonellau, gan gynnwys:

Gall codi cyllid ecwiti fod yn broses eithaf hir a chymhleth. Bydd angen i chi dreulio amser yn dod o hyd i'r buddsoddwr cywir ar gyfer eich cwmni, yn trafod telerau'r fargen, yn hwyluso'r broses diwydrwydd dyladwy, ac yn cwblhau'r dogfennau cyfreithiol terfynol, a hyn oll tra’n rhedeg eich busnes.

Ond trwy fod yn barod ac wedi paratoi'n dda, ac mae hynny’n cynnwys meddu ar gynllun busnes cryf, fe allwch chi helpu i sicrhau bod y broses yn mynd yn fwy llyfn a chynyddu eich siawns o sicrhau buddsoddiad.

Ariannu torfol ecwiti

Mae ariannu torfol ecwiti yn galluogi busnesau preifat i godi arian gan y cyhoedd. Mae'n gweithio mewn ffordd debyg i fathau eraill o gyllid ecwiti - rydych chi'n cyfnewid cyfranddaliadau yn eich cwmni am arian parod. Yr hyn sy'n gwneud ariannu torfol yn wahanol, fodd bynnag, yw eich bod yn cael symiau llai o arian gan nifer fawr o bobl (y 'dorf'). Maent wedyn yn berchen ar gyfran gymesur o ecwiti yn eich busnes.

Mae'r math hwn o ariannu yn digwydd ar-lein ar blatfformau ariannu torfol ecwiti. Mae'r platfformau hyn yn amrywio o ran sut y maent yn gweithredu - er enghraifft, gallant godi ffioedd gwahanol, bod â phrosesau fetio (edrych ar hanes ymgeiswyr) gwahanol, ac arbenigo mewn diwydiannau penodol. Felly mae'n bwysig eu cymharu â gweld pa un sy'n iawn i chi.

Mae'r rhan fwyaf yn ei gwneud yn ofynnol i chi osod targed ariannu ar gyfer eich ymgyrch ac amserlen ar gyfer cyrraedd y targed hwn. Os byddwch chi'n llwyddiannus, yna byddwch chi'n derbyn yr arian ar ddiwedd yr ymgyrch minws unrhyw ffioedd y mae'r platfform yn eu codi. Os na fyddwch chi'n cyrraedd eich targed, bydd y rhan fwyaf o wefannau cyllido torfol yn dychwelyd yr holl arian rydych chi wedi'i godi i'r cefnogwyr, er y gallai rhai ganiatáu i chi eu cadw am ffi.

Sut mae buddsoddwr yn gwneud arian o fuddsoddiad ecwiti?

Mae buddsoddwyr ecwiti yn gwneud arian trwy “enillion cyfalaf”, lle maent yn gwerthu cyfranddaliadau am bris uwch nag y gwnaethant dalu amdanynt, a/neu drwy ddifidendau. Mae difidendau yn gyfran o enillion y cwmni a ddosberthir i'w gyfranddalwyr, a delir yn chwarterol fel arfer.

Nid yw pob busnes yn dewis talu difidendau. Mae rhai, yn enwedig cwmnïau ifanc, yn dewis ail-fuddsoddi elw yn nhwf y busnes. Mae cwmnïau sy'n talu difidend gan amlaf yn gwmnïau mwy, sydd wedi'u hen sefydlu.

Mae sawl ffordd y gall buddsoddwr “ymadael” busnes (gwerthu ei gyfranddaliadau), gan gynnwys:

• Allbryniant y tîm rheoli - mae buddsoddwyr yn gwerthu cyfranddaliadau i dîm rheoli presennol y cwmni buddsoddi
• Gwerthiant masnach - mae'r cwmni buddsoddi yn cael ei werthu i brynwr masnach, fel arfer cwmni arall sy'n gweithredu yn yr un diwydiant
• Gwerthiant eilaidd – mae buddsoddwyr yn gwerthu cyfranddaliadau i brynwr trydydd parti, fel cyfalafwr menter neu gwmni ecwiti preifat
• Cynnig cyhoeddus cychwynnol (CCC) - pan fydd cwmni preifat yn rhestru ei gyfranddaliadau ar y gyfnewidfa stoc

Darllenwch ein canllaw olyniaeth busnes i ddarganfod mwy am wahanol fathau o ddigwyddiadau ymadael.

Dod o hyd i'r buddsoddwr ecwiti iawn

Pan fyddwch chi'n sicrhau cyllid ecwiti rydych chi'n ymrwymo i berthynas hirdymor â'ch buddsoddwr, felly mae'n holl bwysig dewis yr un iawn. Mae hyn yn golygu edrych y tu hwnt i'r arian ac ystyried beth arall y gallant ei ychwanegu ac a allwch chi weithio'n dda gyda nhw. Gallai gofyn y cwestiynau hyn i chi eich hun fod o gymorth:

• Faint o ran ydych chi am iddyn nhw ei chwarae?
• Pa adnoddau maen nhw'n eu darparu? A allan nhw gynnig gwybodaeth, profiad a chysylltiadau?
• A ydyn nhw'n aml yn gwneud buddsoddiadau dilynol mewn cwmnïau?
• A ydyn nhw'n gweddu'n dda i'ch brand a'ch diwylliant?
• Beth yw eu gweledigaeth ar gyfer y cwmni ac a yw'n cyd-fynd â'ch un chi?

*Based on a Beauhurst report, The Deal: Equity investment in the UK in 2020