Trosolwg o'r busnes
Mae Griffiths Waste Management, sydd wedi'i leoli yn Abertawe, yn rhan o Gavin Griffiths Group, busnes teuluol o Gymru sy'n darparu gwasanaethau rheoli gwastraff, ailgylchu, trafnidiaeth, agregau, contractio ac adfer tir i awdurdodau lleol, cartrefi, busnesau a chleientiaid adeiladu ledled Cymru a'r DU. Wedi'i sefydlu yn 2010, mae'n prosesu rhwng 25,000 a 30,000 tunnell o wastraff bob blwyddyn.
Arweinir y busnes gan Gavin Griffiths, Rheolwr Gyfarwyddwr y grŵp. O dan ei arweinyddiaeth, mae'r cwmni wedi parhau i fuddsoddi mewn arloesedd a chynaliadwyedd, gan gydnabod pwysigrwydd cynyddol adennill adnoddau, ailgylchu ac egwyddorion yr economi gylchol o fewn y sector rheoli gwastraff.
Diben y busnes
Mae Griffiths Waste Management yn helpu busnesau, awdurdodau lleol a chymunedau i reoli gwastraff mewn ffordd fwy cynaliadwy drwy wneud y mwyaf o ailgylchu a lleihau dibyniaeth ar safleoedd tirlenwi. Wrth i'r galw am brosesu gwastraff mwy effeithlon gynyddu, nododd y busnes yn ddiweddar yr angen i ehangu ei seilwaith a chynyddu ei gapasiti. Mae datblygu Cyfleuster Adfer Deunyddiau (MRF) newydd yn rhan allweddol o'i strategaeth hirdymor i wella adennill adnoddau, cynhyrchiant a chefnogi'r newid i economi gylchol yng Nghymru.
Gweithio gyda ni
Dyddiad y rownd gyllido fwyaf diweddar: 2026
Maint: £2 filiwn
Cronfa: Cynllun Benthyciadau Busnes Gwyrdd
Sicrhaodd y busnes fenthyciad o £2 filiwn gan Fanc Datblygu Cymru i gefnogi'r gwaith o adeiladu Cyfleuster Adfer Deunyddiau newydd o'r radd flaenaf. Mae'r prosiect yn rhan o raglen fuddsoddi ehangach gwerth sawl miliwn o bunnoedd sydd hefyd yn cynnwys cymorth gan gronfeydd y grŵp a Llywodraeth Cymru.
Mae'r cyfleuster newydd wedi cynyddu'r gallu prosesu o hyd at 30,000 tunnell o wastraff y flwyddyn i gymaint â 200,000 tunnell. Mae'n cynnwys technoleg didoli awtomataidd uwch i wella adennill deunyddiau, lleihau halogiad mewn gwastraff ailgylchadwy a chynyddu cyfaint y deunyddiau wedi'u hailgylchu o ansawdd uchel y gellir eu dychwelyd i'r gadwyn gyflenwi.
Drwy gefnogi prosiectau seilwaith sylweddol, rydym yn helpu busnesau i droi cynlluniau uchelgeisiol yn gyflawniad ymarferol ac yn effaith economaidd hirdymor. Mae'r buddsoddiad yn dangos sut y gall cyfalaf hirdymor helpu busnesau Cymru i ddatgloi cyfleoedd twf mawr wrth gefnogi cynhyrchiant, cynaliadwyedd a pherfformiad amgylcheddol. Disgwylir hefyd iddo sicrhau arbedion carbon oes o fwy na 53,000 tunnell o garbon deuocsid cyfwerth, gan helpu i leihau'r ddibyniaeth ar dirlenwi a chynyddu cyfraddau ailgylchu ar draws y rhanbarth.
Barn pobl
Dywedodd Gavin Griffiths, Rheolwr Gyfarwyddwr, Gavin Griffiths Group:
"Mae'r buddsoddiad hwn yn cynrychioli'r cam nesaf yn esblygiad ein busnes ac yn adlewyrchu ein hymrwymiad hirdymor i gynaliadwyedd, arloesedd a'r economi gylchol.
"Fe wnaethom gydnabod beth amser yn ôl mai adennill mwy o ddeunyddiau, lleihau tirlenwi a chynhyrchu cynhyrchion wedi'u hailgylchu o ansawdd uwch y gellir eu hailddefnyddio mewn diwydiant yw dyfodol rheoli gwastraff. Bydd y cyfleuster newydd hwn yn ein galluogi i wneud yn union hynny.
"Mae Banc Datblygu Cymru wedi bod yn bartner cryf drwy gydol y broses hon. Cymerodd eu tîm yr amser i ddeall ein busnes a manteision amgylcheddol ehangach y prosiect. Mae'r cyllid yn rhoi'r llwyfan i ni ddiogelu dyfodol y busnes, diogelu swyddi a chreu cyfleoedd newydd wrth i'r galw am reoli gwastraff cynaliadwy barhau i dyfu."
Dywedodd Sally Phillips, Gweithredwr Buddsoddi, Banc Datblygu Cymru:
"Mae Griffiths Waste Management yn fusnes Cymreig sefydledig gyda hen enw da a gweledigaeth glir ar gyfer y dyfodol.
"Mae'r buddsoddiad hwn yn cefnogi prosiect sy'n cyflawni manteision economaidd ac amgylcheddol. Bydd y cyfleuster newydd yn cynyddu capasiti ailgylchu yn sylweddol, yn lleihau'r ddibyniaeth ar dirlenwi ac yn cefnogi'r gwaith o greu economi fwy cylchol, wrth ddiogelu swyddi medrus a chreu llwyfan ar gyfer twf yn y dyfodol.
"Dyma'n union y math o brosiect y cynlluniwyd y Cynllun Benthyciadau Busnes Gwyrdd i'w gefnogi, gan helpu busnesau Cymru i fuddsoddi mewn cynhyrchiant, cynaliadwyedd a gwytnwch hirdymor."
