Mae benthyciad o £520,000 gan Fanc Datblygu Cymru wedi helpu perchnogion busnes gofal yn Llandudno i adnewyddu cartref newydd ei brynu a oedd wedi bod ar gau am 10 mlynedd, gan ei droi’n gyfleuster gofal dementia arbenigol. Mae’r buddsoddiad yn mynd i’r afael â’r galw cynyddol am ofal dementia o ansawdd uchel yng ngogledd Cymru.
Mae'r gweithwyr nyrsio cymwysedig Steffan a Bethany Robbins wedi rhedeg Cartref Preswyl Orme View, cartref gofal 14 gwely ar Lan y Gorllewin yn Llandudno, ers y gwanwyn 2023.
Ddiwedd 2024 prynodd y cwpl hen gartref nyrsio Abbey Nursing Home, cartref cyfagos a gaeodd yng nghanol y 2010au. Maent wedi adnewyddu'r adeilad gyda chefnogaeth benthyciad o £520,000 gan Gronfa Buddsoddi Hyblyg Cymru, ac wedi ail agor y cartref fel Orme View Dementia Care i ddarparu gofal dementia arbenigol ar draws 16 gwely. Mae'r gwaith adnewyddu yn cynnwys ailaddurno'r adeilad, a gosod larymau galw, lloriau a llawr newydd.
Mae'r benthyciad ar gyfer Orme View Dementia Care yn un o 49 o fuddsoddiadau gwerth cyfanswm o £35 miliwn sydd wedi'u gwneud yn y sector gofal gan Fanc Datblygu Cymru ers ei lansio yn 2017 – gyda £15 miliwn wedi'i fuddsoddi mewn 14 o ddarparwyr gofal yn 2024/25.
Dyma'r ail dro i'r Banc Datblygu gefnogi Steffan a Bethany Robbins, wedi iddynt gael benthyciad o £475,000 gan Gronfa Busnes i Gymru i'w helpu i brynu Orme View yn 2023. Mae lleoedd i breswylwyr yng Nghartref Gofal Dementia Orme View eisoes wedi'u dyrannu'n llawn, gyda'r rhan fwyaf o breswylwyr wedi'u cyfeirio at y cartref gan Gyngor Conwy yn dilyn cau Cartrefle, cyfleuster gofal dementia yn Llanrwst, ym mis Mai.
Dywedodd Steffan Robbins, perchennog Orme View: “Mae galw mawr am ddarpariaeth gofal dementia yn yr ardal hon, ac mae cau cartref gofal arall yn Sir Conwy yn ddiweddar wedi golygu ein bod eisoes wedi gweld galw mawr hyd yn oed cyn i ni agor ein drysau.
“Mae’r gefnogaeth rydyn ni wedi’i chael gan Fanc Datblygu Cymru wedi golygu ein bod ni wedi gallu symud ymlaen yn gyflym gydag adnewyddu Orme View Dementia Care fel y gallen ni ei godi i’r safon ofynnol. Mae’r amser troi cyflym hwnnw’n golygu ein bod ni wedi gallu hyfforddi staff newydd yn gyflym a pharatoi’r cartref i groesawu preswylwyr cyn gynted â phosibl.”
Meddai Stewart Williams, Swyddog Portffolio Banc Datblygu Cymru: “Mae gan Steffan a Bethany hanes rhagorol o ran darparu gofal lleol, ac maen nhw mewn sefyllfa dda i ymgymryd â rhedeg Orme View Dementia Care.
“Mae gofal yn flaenoriaeth gynyddol ledled Cymru. Drwy gefnogi perchnogion busnesau fel Steffan a Bethany, rydym yn helpu i sicrhau bod gofal o ansawdd uchel, sy'n canolbwyntio ar y person, ar gael lle mae ei angen fwyaf.”
Mae buddsoddiadau eraill gan Fanc Datblygu Cymru yn y sector gofal yn cynnwys benthyciad o £2.97 miliwn i gefnogi prynu Bankhouse Care Home, yng Nglynebwy, gan y Grŵp Gofal Oxford Care Group; helpu perchnogion busnesau gofal Basanta Nepal a Bishwa Tara Ghimire i brynu cartref gofal Cherry Tree Care Home yng Nghil-y-coed; a helpu perchnogion newydd i ymgymryd â Chartref PreswylGwyddfor Residential Home ger Bodedern, Ynys Môn.
Mae Cronfa Buddsoddi Hyblyg Cymru yn cynnig cyllid ar gyfer bargeinion rhwng £25,000 a £10 miliwn, gyda benthyciadau, cyllid mesanîn a buddsoddiadau ecwiti ar gael.
Am ragor o wybodaeth, ewch i www.datblygubanc.cymru
