Cynllun Benthyciad Busnes Covid-19 Cymru

Cyhoeddwyd y ffigurau terfynol gan Fanc Datblygu Cymru heddiw ar gyfer Cynllun Benthyciad Busnes Covid-19 Cymru. Roedd y gronfa'n rhan o Gronfa Cadernid Economaidd ehangach Llywodraeth Cymru gwerth £500 miliwn ac yn darparu cyfalaf gweithio i fusnesau sy'n profi anawsterau gyda llif arian o ganlyniad i'r pandemig.

Ar 30 Gorffennaf, manteisiodd cyfanswm o 1,331 o fusnesau ar gyfleusterau benthyciad o ychydig dros £92 miliwn gan helpu i ddiogelu dros 16,000 o swyddi. 

Roedd y benthyciad cyfartalog i fusnesau a fanteisiodd ar Gynllun Benthyciad Busnes Covid 19 Cymru yn £68,913 gyda'r meysydd adeiladu, gweithgynhyrchu, manwerthu a lletygarwch yn cyfrif am bron i hanner y benthyciadau a ddyfarnwyd. Roedd dosbarthiad daearyddol da ymhlith y nifer a gafodd fenthyciad gyda 399 o gwmnïau yng Nghanolbarth a Gorllewin Cymru, 334 yn y Gogledd a 598 yn y De.

Dywedodd Giles Thorley, Prif Weithredwr Banc Datblygu Cymru: “Mae hwn wedi bod yn gyfnod eithriadol o anodd i fusnesau bach ledled Cymru sydd wedi wynebu heriau enfawr o ran goroesi’r cyfnod hwn, amddiffyn bywoliaeth pobl a diogelu eu swyddi. Mae'r galw mawr am yr holl gynlluniau benthyciadau a gefnogir gan y llywodraeth, gan gynnwys ein Cynllun Benthyciad Busnes Covid-19 ni, yn dangos yr angen am gymorth gyda llif arian.

“Wrth i ni gymryd camau i ailagor yr economi rydym yn parhau i fod yn ymrwymedig i gefnogi'r gymuned busnesau bach a byddwn yn parhau i weithio’n agos gyda Llywodraeth Cymru a phartneriaid eraill wrth i ni ymdrin â’n hadferiad economaidd a mynd i’r afael â’r her o helpu busnesau ledled Cymru i ailgychwyn ac adfer.”

Dywedodd Gweinidog yr Economi, Trafnidiaeth a Gogledd Cymru, Ken Skates: “Mae Banc Datblygu Cymru wedi chwarae rhan hanfodol o ran ein helpu i ymdopi â’r pwysau digynsail y mae'r coronafeirws wedi’i roi ar ein heconomi.

“Mae Cynllun Benthyciad Busnes Covid-19 Cymru wedi gweld staff yn gweithio’n ddiflino ochr yn ochr â ni i ddarparu achubiaeth hanfodol i fusnesau a hynny'n gyflym, yn effeithlon a hyblyg, gan ddarparu ychydig dros £92 miliwn i oddeutu 1300 o fusnesau yng Nghymru a diogelu miloedd o swyddi.

“Mae'r Banc eisoes wedi ychwanegu gwerth mawr at y dirwedd fusnes fywiog yr ydym yn ei meithrin yma yng Nghymru, a bydd hynny'n bwysicach nag erioed wrth i ni ailgodi'n gryfach yn dilyn effaith y pandemig a pharhau â'n gwaith i sbarduno twf cynhwysol ledled Cymru.”