Holbrook Customs yn cyflymu twf gyda buddsoddiad o £300,000 gan Fanc Datblygu Cymru

Mae buddsoddiad o £300,000 gan Fanc Datblygu Cymru ar fin sbarduno'r cam nesaf o dwf i'r arbenigwyr trosi faniau cysgu Holbrook Customs,sydd wedi'u lleoli ym Mhen-y-bont ar Ogwr.

Caiff ei ddarparu drwy gyfrwng Cronfa Buddsoddi Hyblyg Cymru, ac fe fydd y buddsoddiad yn caniatáu i Holbrook Customs hybu cynhyrchiant, ehangu ei dîm a dod â mwy o waith yn ‑fewnol, gan gryfhau creu swyddi lleol a chadwyn gyflenwi ranbarthol sy'n tyfu.

Y tîm sy’n ŵr a gwraig Matthew a Candice Holbrook yw’r perchnogion a’r rhai sy’n rhedeg y busnes. Dechreuodd y busnes gyda'u hangerdd gyffredin dros faniau cysgu VW. Roedd y ddau wedi trosi eu cerbydau eu hunain ers blynyddoedd cyn ymgymryd â phrosiectau i ffrindiau, a thyfodd y galw'n gyflym wrth iddynt hyrwyddo eu gwaith ar y cyfryngau cymdeithasol ac mewn ralïau VW. Ar ôl symud yn ddiweddar i uned 16,000 troedfedd sgwâr, mae'r busnes bellach yn gweithredu o un o'r cyfleusterau trosi faniau campio pwrpasol mwyaf yng Nghymru.

Bydd y buddsoddiad diweddaraf gan y Banc Datblygu yn cefnogi'r busnes wrth iddo gynyddu ei gapasiti cynhyrchu, gan gynnwys datblygu pedair‑uned wedi'u hadeiladu ymlaen llaw bob mis mewn ymateb i alw cryf a chyson gan gwsmeriaid. Bydd hefyd yn helpu Holbrook Customs i dyfu ei weithlu medrus, sy’n gam pwysig wrth ddiwallu'r galw tra’n creu cyfleoedd cyflogaeth newydd yn lleol.

Bydd cyflwyno bwth chwistrellu mewnol yn lleihau allanoli, yn gwella effeithlonrwydd ac yn caniatáu i fwy o wariant y cwmni i aros yng Nghymru. Mae uwchraddiadau wedi'u targedu hefyd wedi'u cynllunio ar gyfer y safle ei hun, yr ystafell arddangos a'r brandio.

Mae'r buddsoddiad diweddaraf yn dilyn micro-fenthyciad cynharach o £40,000 gan y Banc Datblygu i'r busnes yn 2022.

Meddai Matthew Holbrook, cyd- ‑berchennog Holbrook Customs: “Rydym yn hynod falch o ba mor bell y mae’r busnes wedi dod. Mae’r hyn a ddechreuodd fel rhywbeth yr oeddem yn mwynhau ei wneud yn ein hamser hamdden wedi datblygu’n weithrediad llawn sy’n gwasanaethu cwsmeriaid o bob cwr o’r DU.

“Mae galw mawr am drosiadau o ansawdd uchel, ac rydym wedi ymrwymo i adeiladu faniau sydd nid yn unig yn edrych yn wych ond sy'n sefyll prawf amser. Mae'r gefnogaeth gan y Banc Datblygu yn golygu y gallwn gynyddu cynhyrchiant, cyflogi mwy o staff a dod â mwy o'n gwaith yn fewnol wrth i ni barhau i dyfu.”

Meddai Kelly Jones, Swyddog Portffolio ym Manc Datblygu Cymru:

“Mae Holbrook Customs yn enghraifft wych o fusnes Cymreig sydd wedi trawsnewid angerdd ac arbenigedd yn fenter sy’n tyfu’n gyflym gyda chyrhaeddiad cenedlaethol. Mae Matt a Candice wedi meithrin enw da rhagorol am grefftwaith ac ansawdd, ac mae eu huchelgeisiau ar gyfer y dyfodol yn amlwg. Bydd ein buddsoddiad yn eu helpu i ehangu eu gweithrediadau, creu cyfleoedd am swyddi newydd a pharhau i gyfrannu at dwf economaidd yng Nghymru.”

Wedi'i ariannu gan Lywodraeth Cymru, mae Cronfa Buddsoddi Hyblyg Cymru yn cefnogi busnesau sefydledig Cymru gyda benthyciadau hyblyg yn amrywio o £25,000 i £10 miliwn, gan helpu cwmnïau i fuddsoddi, ehangu a chyrraedd marchnadoedd newydd.

Am ragor o wybodaeth, ewch i weld www.datblygubanc.cymru