Cyfalaf menter

Mae cyfalafwyr menter yn defnyddio'r cyfalaf maen nhw'n ei godi i fuddsoddi mewn busnesau sydd â photensial twf uchel neu fusnesau sydd eisoes wedi dangos twf trawiadol. Mae gwahanol gamau o gyllid cyfalaf menter sy'n adlewyrchu gwahanol gamau datblygiad cwmni. Wrth i fusnesau newydd dyfu, byddant yn aml yn mynd trwy'r camau hyn ac yn codi sawl rownd o gyllid cyfalaf menter.

Mae gan rai cwmnïau CM ddull amrywiol ac maent yn buddsoddi mewn cwmnïau ar wahanol gamau o gylchred bywyd y busnes, tra bod eraill yn canolbwyntio'n benodol ar gamau penodol. Er enghraifft, mae buddsoddwyr cyfnod sbarduno yn helpu cwmnïau newydd cyfnod cynnar i gychwyn, tra bod buddsoddwyr cyfnod hwyr yn helpu cwmnïau sefydledig i barhau â'u hehangu. Gyda chyllid cyfalaf menter, gall busnesau yn aml gael symiau mawr o gyfalaf.

Mae cyfalafwyr menter yn fwyaf adnabyddus am ariannu cwmnïau technoleg oherwydd eu tueddiad i ehangu'n hawdd, ond maent yn buddsoddi mewn busnesau nad ydynt yn dechnoleg hefyd. Yr hyn sydd gan bob busnes a gefnogir gan fenter yn gyffredin yw eu bod yn canolbwyntio ar dwf cyflym a sylweddol.

Mae cyfalaf menter yn fwyaf addas ar gyfer mentergarwyr sydd ag uchelgeisiau mawr nad oes angen iddynt gadw rheolaeth lawn dros y cwmni wrth iddo dyfu.

Fel gydag unrhyw fath o fuddsoddiad, mae yna fanteision ac anfanteision i'w hystyried bob amser cyn penderfynu a yw'n llwybr cywir i chi.

Dyma ychydig o bethau y dylai entrepreneuriaid eu hystyried wrth archwilio cyfalaf menter.

Y manteision:

1. Mae’n agor drysau: gall cyfalaf menter gynnig cyllid cynnar i fusnesau newydd nad oes ganddynt fynediad at opsiynau ariannu traddodiadol fel benthyciadau banc. Mae'n rhoi mynediad i fentergarwyr at y cyfalaf sydd ei angen i lansio a thyfu eu busnes.
2. Arbenigedd ac arweiniad: mae cyfalafwyr menter yn dod â gwybodaeth, profiad a rhwydweithiau gwerthfawr am y diwydiant. Gallant ddarparu arweiniad strategol, mentora a chysylltiadau i helpu mentergarwyr i ehangu eu busnesau'n fwy effeithiol.
3. Hygrededd: gall sicrhau cyfalaf menter wella hygrededd busnes newydd. Mae'n arwydd i fuddsoddwyr, cwsmeriaid a phartneriaid posibl eraill bod y busnes wedi bod trwy broses ddiwydrwydd dyladwy trylwyr a'i fod yn cael ei gefnogi gan fuddsoddwyr profiadol.
4. Twf cyflymach: mae cyfalaf menter yn galluogi twf cyflym trwy ehangu gweithrediadau, cyflogi talent, datblygu cynhyrchion a mynd i mewn i farchnadoedd newydd.

Ystyriaethau i sylfaenwyr:

1. Rhannu rheolaeth: bydd gan gyfalafwyr menter ecwiti yn eich cwmni yn gyfnewid am eu buddsoddiad. Yn dibynnu ar y telerau, efallai y bydd yn rhaid i chi rannu pŵer gwneud penderfyniadau a rheolaeth gyda buddsoddwyr, ond gallai hyn hefyd fod yn gadarnhaol os ydynt yn dod â phrofiad a gwybodaeth.
2. Cynllunio ymadael: bydd cyfalafwyr menter eisiau gwybod sut y byddant yn ymadael â'r busnes a byddant yn disgwyl enillion sylweddol ar eu buddsoddiad yn yr amserlen honno; rhywbeth y mae angen i chi feddwl amdano cyn i chi ddechrau'r broses.
3. Perchnogaeth: wrth i fusnes godi sawl rownd o gyfalaf menter, gall cyfran berchnogaeth y tîm sefydlu gael ei wanhau. Mae hyn yn golygu y gallai sylfaenwyr fod yn berchen ar ganran lai o'r cwmni dros amser, gan leihau eu helw ariannol yn y pen draw o bosibl os bydd y busnes yn llwyddo.

Yn wahanol i fuddsoddwyr angel sy'n defnyddio eu harian eu hunain i fuddsoddi, mae cyfalafwyr menter fel arfer yn gweithio i gwmnïau cyfalaf menter sy'n codi arian gan fuddsoddwyr allanol. Gall y buddsoddwyr hyn, a elwir yn bartneriaid cyfyngedig, gynnwys unigolion gwerth net uchel, swyddfeydd teuluol, a buddsoddwyr sefydliadol fel cronfeydd pensiwn a chwmnïau yswiriant.